Alain Robert i njohur ndryshe edhe si ‘spidermani’ francez u arrestua në Manila të Filipineve pasi u ngjit në një prej ndërtesave më të larta të qytetit për të përjetuar aventurën e radhës të rrezikshme në jetën e tij, lajm që u konfirmua nga policia lokale.
Robert, tashmë 56 vjecar u ngjit në ndërtesën GT Tower me 47 kate pa përdorur masa sigurie duke i lënë të habitur të gjithë të pranishmit që ishin dëshmitarë të kësaj ndërmarrjeje të tij. Por policia ishte më pak entuziaste për këtë arritje dhe e arrestoi Alain Robert me të zbritur në tokë, pas kësaj ngjitjeje që zgjati 2 orë duke e akuzuar për prishje të rendit publik.
Alain Robert ka ngjitur më shumë se 100 ndërtesa pa litarë apo mjete të tjera sigurie duke shënuar emrin në librin e Rekordeve Guinnes si personi që ka ngjitur më shumë ndërtesa pa ndihmë.
Mes sukseseve të tij përmendet ngjitja në Kullën Eiffel, Sydney Opera House, Kullat Petronas në Kuala Lumpur apo Burj Khalifa në Dubai. Në qershor Robert tentoi që të ngjisë ndërtesën prej 123 katesh Lotte World Tower në Seul por policia nuk e lejoi. Alain Robert është arrestuar edhe herë të tjera për iniciativat e tij plot adrenalinë e njëkohësisht të rrezikshme.
a.cupaj
