Shfaqja me fishekzjarrë në tribunat e “Elbasan Arena” duke ndezur e hedhur flakadanë aq sa për ndërprerë derbin, mund të jetë cilësuar si një “spektakël” nga tifozët e Partizanit dhe nga vetë klubi i kuq i cili nuk ka ngurruar të postoje me krenari fotot e atyre momenteve në rrjetet sociale.
Por ekziston edhe një rregullore aktiviteti falë të cilës tifozeria e Partizanit e ka pësuar nga një sjellje e tillë. Komisioni i Disiplinës, për shkak të atyre momenteve në fillimin e pjesës së dytë të derbit, ka vendosur të dënoje ashpërsisht klubin e Partizanit, duke e detyruar që të luajë një ndeshje pa tifozë.
“KF “Partizani”, për sjellje të gabuar të spektatorëve, duke hedhur mjete ndezëse në fushë duke shkaktuar ndërprerjen e shkurtër të lojës, në bazë të nenit 66/3/a të KDS, dënohet me zhvillimin e 1 (një) ndeshje pa spektatorë në stadiumin përkatës”, shkruhej në shpjegimin e FSHF-së.
Nuk ia ka hedhur pa u dënuar as klubi i Tiranës, tifozët e të cilit nuk kanë kursyer ndezjen e flakadanëve në tribuna. “KF “Tirana”, për sjellje të gabuar të tifozëve, duke hedhur mjete ndezëse në fushën e lojës dhe duke qenë përsëritës në të njëjtën shkelje, dënohet me 200000 (dyqind mijë) lekë gjobë, në bazë të nenit 66/2 KDS”. Duket se ndryshimin në masën ndëshkimore e ka bërë fakti që tifozeria e kuqe arriti me sukses të ndërpriste ndeshjen me “spektaklin” e dhuruar, ndërsa ajo bardheblu, nuk ia doli ta bënte një gjë të tillë e si rrjedhojë do të shohë qetësisht në tribuna ndeshjen e radhës të Tiranës.
Edhe Laçi është dënuar me një ndeshje pa tifozë “për sjellje të gabuar të spektatorëve, duke hedhur sende në fushën e lojës”. Ndërkaq, Besa, meqë nuk arriti të fillonte në kohë ndeshjen e javës së parë të Kategorisë së Parë ndaj Beslidhjes, është dënuar me 250000 lekë gjobë.
Shihet qartësisht që FSHF ka rritur masat ndëshkimore, pasi zëvendëstrajneri i Flamurtarit, Klodian Dervishi është ndëshkuar me 2 ndeshje pezullim dhe 100000 lekë gjobë për kontestimet ndaj gjyqtarëve. Ndërsa lojtari i Bylisit, Jasmin Raboshta, për goditje me grusht ndaj kundërshtarit, është dënuar me 5 ndeshje pezullim.
ma.me
