Ministria e Drejtësisë në Kosovë njoftoi se procedurat për të vizituar të akuzuarit për krime lufte në gjykatën speciale me seli në Hagë do të thjeshtohen.
“Procedurat e komplikuara për lëshimin e dokumentacionit të familjarëve – vizave, të cilët vizitojnë të afërmit e tyre në Qendrën e Paraburgimit në Hagë, shujtat javore të njëjta, problemet me porositë dhe pagesat, zvogëlimi i orarit të shëtitjes gjatë fundjavave si dhe pagesat e vështirësuara për disa nga avokatët, kanë qenë disa nga shqetësimet e tyre”, deklaroi ministria.
Njoftimi u bë pas takimeve që një delegacion i kësaj ministrie pati me zyrtarët e gjykatës speciale të Hagës, njohur zyrtarisht si Dhomat e Specializuara të Kosovës në Hagë. Kjo gjykatë funksionon në bazë të ligjeve të Kosovës, me përjashtim se trupa e saj përbëhet nga të huaj dhe selinë e ka në Hagë.
Takimet u mbajtën pas shqetësimeve të bëra nga familjarët e të akuzuarve për krime lufte, që thanë se procedurat e kësaj gjykate për t’i takuar janë sfilitëse, të komplikuara dhe shpesh ndaluese.
Në Hagë po zhvillohen disa procese gjyqësore të bujshme, si ai ndaj ish-Kryeministrit e ish-Presidentit Hashim Thaçi, ndaj ish-kryetarëve të Kuvendit, Kadri Veseli dhe Jakup Krasniqit.
/m.j
