Gjykata Kushtetuese e Kosovës kërkon nga palët, që të japin komente dhe informacione për kërkesën e opozitës, që të shqyrtojë vendimin e Kuvendit të Kosovës për krijimin e Gjykatës Speciale.
Përmes një njoftimi për mediat, Gjykata Kushtetuese njoftoi se e ka pranuar kërkesën e opozitës dhe është duke e shqyrtuar atë, raporton Top Channel.
“Gjykata Kushtetuese e Kosovës njofton se ka pranuar kërkesën e dorëzuar nga 24 deputetë të Kuvendit të Kosovës, e cila përmban kërkesën e vlerësimit të kushtetueshmërisë lidhur me vendimin e Kuvendit për miratimin e amandamentit 24 në Kushtetutë”, thuhet në njoftimin e gjykatës.
Më tej, ky institucion thekson se, në përputhje me praktikën e gjykatës për kërkesat e dorëzuara, të gjitha palëve të përfshira u është kërkuar të japin komente dhe informacione të tjera mbi këtë kërkesë. Vendimi për këtë çështje thuhet se do të merret në kohën e duhur.
Pak ditë pasi Kuvendi i Kosovës miratoi ndryshimet kushtetuese për krjimin e Gjykatës Speciale, opozita iu drejtua Gjykatës Kushtetuese me argumentin se, këto ndryshime janë votuar në kundërshtim me rregullat parlamentare, të cilat kërkojnë që për çdo ndryshim të Kushtetutës të merret mendimi i Gjykatës Kushtetuese.
Kjo, edhe për faktin se Qeveria e Kosovës i ka proceduar për të dytën herë këto materiale në Kuvend, pasi në të parën, në seancën e 26 qershorit, Kuvendi i ka thënë “Jo” krijimit të Gjykatës Speciale.
