Nga Ben Andoni
Kosova këtë vit përballet me një nga sfidat më të mëdha të pas pavarësisë dhe kjo lidhet me përballimin e trandjeve që do të sjellin zhvillimet e Gjykatës Speciale. Janë paralajmëruar arrestimet e para, ndaj inercia e lajmeve për emrat e përfolur BIG ndjehet fuqimisht në Kosovë. Mbrëmjen e të premtes u tentua në orët e fundit të funksionimit të Kuvendit të Kosovës të sillej një kërkesë e firmuar prej 43 deputetëve për shfuqizimin e Ligjit për Dhomat e Specializuara dhe Zyrën e Prokurorit të Specializuar. Më shkurt Gjykatës Speciale që po merret me krimet specifikisht të shqiptarëve.
Paradoksalisht, Gjykata Speciale është votuar në vitin e 2015 me votën e deputetëve të Kuvendit të Kosovës. E kur kanë kaluar gati 2 vite e gjysmë pas formimit të saj, u bë një përpjekje e ngucur të sillej vendimi për shfuqizimin e ligjit për Specialen nga pikërisht ata që e kanë votuar atë. Ndoshta gjithçka do shkonte sipas parashikimit nëse ambasadorët e vendeve të Quintit (Përfaqësitë e vendeve kryesore që kanë ndihur pavarësinë) do të flinin dhe nuk do të ngriheshin menjëherë për ta kundërshtuar. Alarmi, por me sa duket mekanizmat speciale të paralajmërimit të tyre, bënë që kjo kërkesë të mos shqyrtohej. Sikur të dëgjoje apelet e ambasadorëve amerikan dhe atij britanik, sponsorizuesve më të mëdhenj të pavarësisë të Kosovës, atëherë kushdo do të bindej se një dorë e mbrapsht po përpiqet të çbëjë atë që mezi është rregulluar në Kosovë.
Opinioni kosovar ka kohë që pret të ketë një drejtësi për të vrarët e shumtë kosovarë, por dhe viktimat shqiptare dhe serbe kosovare, këtë herë nga dora e shqiptarëve. Pret me padurim edhe për t’i vënë fre disi politikanëve të fortë kosovarë, një pjesë e madhe syresh dalë nga lufta dhe që e tund kartën e luftës për kredo që nuk i meriton në paqe. Por edhe për llogaritë ndaj pasurive të frikshme që kanë vënë në gati dy dekada të pas Luftës.
Si për ironi të gjithë historisë, pak ditë më parë, një nga eksponentët e lartë të organizatës së UÇK-së është shprehur pa vrasje ndërgjegje për të vrarët e shumtë nga radhët e vetë kosovarëve pas luftës, duke e ofenduar rëndë kujtimin e tyre. Ajo që besohet më shumë nga të gjitha është se tre njerëzit kryesorë të Luftës që sot mbajnë tre postet kryesore qeveritare: Hashim Thaçi, Ramush Haradinaj dhe Kadri Veseli, por edhe entourage-t e tyre duhet të përballen hapur me të vërtetën e hidhur.
Në të gjithë këto zhvillime më i tmerrshëm ka qenë sigurimi i lehtë i numrit të duhur të deputetëve, që e mundësonte kërkesën. Kuptohet se pas alarmit së të huajve kanë sjellë përgjigjet naive se nuk dinin se çfarë kishin firmosur!!! Por i gjithë ky proces ishte kopsitur aq qartë saqë ka fajësuar direkt deputetët kosovarë, fillimisht për nivelin e tyre dhe së dyti për mungesën e parimeve. Ky nivel i ulët politik dhe mbi të gjitha mungesa e kredos morale i bën politikanët kosovarë t’i kushtojnë shumë imazhit të vendit, por edhe të gjithë përpjekjes që po bëhet për të mbajtur Kosovën.
Dhe kur kujton varfërinë, skamjen, korrupsionin etj. në Kosovë, atëherë bindesh se futja në hulli e të gjitha elementëve ku preken dhe interesat jetike të ekzistencës së Kosovës e bën të ardhmen e trishtë. Kjo nuk ka rëndësi, i vetmi qëllim mbetet përjetësimi i të fortëve të politikës dhe shpurave të tyre të mumizuara. Vetëm po të jenë të qetë ata do të jenë të qetë të gjithë, duket sikur thotë ky realitet. Apo do të jetë e qetë Kosova e cfilitur për dekadash mbijetese.
Në fakt, Kosova do të jetë e qetë dhe drejt përparimit kur një takëm që e përdori luftën kundër njerëzve të thjeshtë dhe derdhi gjak shqiptari të prehet pas hekurave. Mu aty, ku shpresohet që Specialja të vendosë të fortët e Kosovës. (Javanews)
