Salutimi ose nderimi me dorë mendohet shpesh se daton që në kohërat romake, por nuk ka dëshmi se ushtarët e ngrinin dorën e tyre si një përshëndetje formale. Një teori thekson se ajo e ka origjinën në Evropën mesjetare, kur kalorësit përdornin dorën për të ngritur strehën e përkrenares, duke zbuluar identitetin e tyre dhe duke demonstruar se ishin miqësorë.
Por një shpjegim i tillë shihet me skepticizëm.
Më vonë u bë traditë e ushtrisë britanike. Ushtarët dhe nënoficerët hiqnin kapelen për të përshëndetur oficerët. Oficerët e rinj bënin të njëjtën gjë me eprorët. Kjo përfundoi mesa duket në shekullin e 18-të, për shkak të shqetësimeve se veshja e tepruar mbi kokë ishte bërë e rëndë.
Një libër britanik me urdhra i vitit 1745, theksonte: “Burrat janë të urdhëruar të mos e heqin kapelen e tyre kur kalon një oficer, ose të flasin me ta, por thjesht të përplasin duart e tyre mbi kapele dhe të përkulen kur ata kalojnë”.
Ushtria Britanike kishte një përshëndetje me pëllëmbën e dorës nga jashtë, që u përdor gjithashtu nga Forcat Ajrore Mbretërore. Marina Mbretërore, nga ana e saj, miratoi një version me pëllëmbën e dorës nga poshtë, kjo mesa duket për shkak se shumë njerëz që punonin në anije i kishin duart e pista dhe nuk ishte mirë që t’i shfaqnin ato.
Përshëndetja shërben edhe si një shenjë njohjeje për oficerët dhe zyrtarët e lartë, thotë Simon Lamb, nga grupi për Njohjen e Veteranëve Britanikë. Ai shton se është e rëndësishme që personi i lartë të kthejë përshëndetjen në formë respekti.
Forma e përshëndetjes e Marinës Mbretërore mendohet se ka ndikuar ushtrinë amerikane, versioni i të cilëve është me pëllëmbën poshtë.
Mirësjellja është e rëndësishme. Vitin e shkuar në shtator, presidenti amerikan, Barack Obama u kritikua pasi përshëndeti me dorë, ndërkohë që mbante një filxhan kafeje.
“Një përshëndetje e tillë është më e keqe se të mos përshëndesësh fare,” thotë Roja Bregdetare Amerikane, e cila si shumë organizata të tjera jo- ushtarake, nderon me dorë.
Për shkak se ushtria britanike është e përfshirë në operacione me dy ose më shumë forca të armatosura të tjera, oficerët e rinj hutohen për gradat dhe kur duhet të përshëndesin. Për këtë arsye, Ministria e Mbrojtjes ka publikuar një tabelë ku shpjegon renditjen dhe shenjat dalluese.
