Nga Ben Andoni
Ndërsa ngjarja me makinën e blinduar në Elbasan ka kapluar të gjithë mediat dhe ka treguar ineficensën e policisë shqiptare, një lajm i djeshëm është kaluar gati pa asnjë rëndësi. Kreu i Gjykatës së Shkallës së Parë në Vlorë, Skënder Halluci, ka bërë një deklaratë të fortë publike, e cila ka sjellë një turbullim të madh, për njerëzit që e kanë ndjekur. Pak a shumë deklarata ishte e tillë: në tre vitet që ai ka drejtuar këtë gjykatë, nuk ka mbërritur në bankën e të akuzuarve asnjë organizator i kultivimit të kanabisit. Në fakt, deklarata e tij shtrihej vetëm për qarkun e Vlorës, por situata është gati e njëjtë në të gjithë vendin. Dhe akuzat për këtë kanë qenë të shpeshta nga shumë aktorë, por që në fund kanë përfunduar gjithmonë me disa fatkeqë pas hekurave dhe të fortët që ikin ende pa u realizuar aksioni. Në shumë kronika janë paraqitur dekonspirime të shumta aksionesh policie dhe më shumë akoma një sistem lajmërimi dhe funksionalizmi i botës së errët të krimit shumë të sofistikuar.
Akuza nuk mbaron këtu, sepse deri sot e kësaj dite, organet e policisë me institucionet e ushtrisë janë konfrontuar sa i përket nxjerrjes jashtë funksionimi të radarëve. Debati u fashit disi në ditët e fundit, por nxori dhe njëherë faktin se ajo që flitet nuk është e gënjeshtërt. Të fortët janë të mbrojtur sepse pas tyre janë gjithmonë politikanët. Këta të fundit mjafton t’u shohësh gjuhën e trupit apo t’u dëgjosh ligjërimin dhe e kupton sesi janë të ndërtuar. Ata sulmojnë me akuza dhe ligjërime më shumë se krimi sepse pas tyre gjithnjë gjenden të fortë. Mjafton të shikosh eskortat në rrethe të miqve të politikës dhe kupton sesi funksionon ky shtet. Ku krimi ka kapur gjithçka, por më shumë nga të gjitha ka të shtrirë tentakulat ngado. Ti e shikon te privatizimet, e shikon nga pasurimet e shpejta, e shikon nga beneficet, e shikon nga trafikimet.
Për fat të keq, ende sot e kësaj dite, megjithëse Shqipëria është e mbushur me OJQ dhe institucione të huaja, nuk ka një studim mirëfilli për MAFIA-n shqiptare, aman një gjë është e vërtetë, se ajo që kinse politika bën ndaj krimit, thjesht fsheh faktin se krimi është afër politikës. Për këtë nuk mjaftojnë më akuzat e pozitës dhe opozitës ndaj njëra-tjetrës, shteti është gjithnjë më i dobët para krimit. (JavaNews)
