Të paktën 12 persona kanë vdekur si pasojë e një zjarri të madh në Los Gallardos në provincën juglindore të Almerías në Spanjë, ndërsa gjashtë të tjerë janë plagosur.
Disa nga viktimat u gjetën brenda automjeteve të cilat ishin përfshirë nga flakët. Dëshmitarët thonë se zjarri u shkaktua nga një linjë elektrike, me flakët që u përhapën me shpejtësi në një zonë të pyllëzuar aty pranë. Autoritetet nuk e kanë konfirmuar shkakun e zjarrit.
Një valë e vazhdueshme e të nxehtit me temperatura rreth 40 gradë Celsius ka shkaktuar zjarre në të gjithë Evropën Jugore.
Qindra zjarrfikës po përballen me incidente të mëdha në Francë, Portugali dhe Spanjë, me mijëra persona të detyruar të largohen nga shtëpitë e tyre.
“Numri i personave që vdiqën në zjarrin në Los Gallardos është rritur në 12 pas konfirmimit të gjashtë vdekjeve të tjera”, tha qeveria rajonale e Andaluzisë në një deklaratë.
Kreu i qeverisë rajonale, Juanma Moreno, i quajti vdekjet “një tragjedi”. Zjarri çoi gjithashtu në mbylljen e rrugëve, ndërsa 1,000 banorë u evakuuan, sipas shërbimeve të emergjencës.
Vitin e kaluar, një sipërfaqe rekord prej 393,000 hektarësh u dogjën në Spanjë, sipas Sistemit Evropian të Informacionit për Zjarret në Pyje (EFFIS), më shumë se gjashtë herë më e lartë se mesatarja spanjolle për periudhën midis viteve 2006 dhe 2024.
Ndryshimi i klimës po rrit temperaturat në të gjithë botën, dhe Evropa është kontinenti që po ngrohet më shpejt , duke u ngrohur dy herë më shpejt se mesatarja globale, sipas shërbimit klimatik Copernicus.
Kjo po shkakton rritje të valëve të të nxehtit gjatë verës, presion më të madh mbi furnizimin me ujë të Evropës dhe zjarre më intensive.
Viti i kaluar ishte sezoni më i keq i zjarreve në Bashkimin Evropian që nga fillimi i mbajtjes së të dhënave në vitin 2006 , me më shumë se një milion hektarë të djegura në të gjithë BE-në.
Sezoni i përkeqësuar i zjarreve në Mesdhe është lidhur drejtpërdrejt me ndryshimet klimatike në një studim të veçantë nga grupi World Weather Atribution në Imperial College London. Ekspertët paralajmërojnë se zjarret më të shpeshta dhe më të rënda në të gjithë Evropën ka të ngjarë të vazhdojnë në të ardhmen.
