Real Madridi ka kaluar grupet e Ligës së Kampionëve dhe kundërshtari i saj është skuadra italiane Roma. Por Real Madridi mund të përballet me fatin e saj të keq ndaj trajnerit të ri të Romës Luciano Spalleti. Pikërisht Spalleti është trajneri i vetëm që ka bilanc të 100% ndaj Real Madridit në garën më të madhe evropiane për klube, Ligën e Kampionëve. Spalleti ka dy përballje me Realin dhe të dyja i ka fituar me rezultat të njëjtë 2:1, njërën në ‘Olimpico’ dhe tjetrën në ‘Santiago Bernabeu’. Ishte viti 2008, kur Roma dhe Reali u takuan në këtë raund të garash dhe ‘Giallorosët’, fillimisht triumfuan në shtëpi 2:1 falë golave të Pizarros dhe Mancinit edhe pse Reali kishte epërsinë nëpërmjet Raulit.
Në ndeshjen e kthimit kur pritej që Reali të rikthehet dhe të kalojë në çerekfinale, Roma i befasoi ata me një lojë të mrekullueshme dhe triumfoi 1:2 falë golave të Vucinicit dhe Taddeit, ndërsa për ‘mbretërit’ kishte realizuar përsëri Raul. Spalleti është rikthyer përsëri në Romë, dhe tani ka përballjen me klubin që nuk ka arritur ta mposhtë në dy përballje. Mbetet të shihet nëse do të vazhdoi Spalleti këtë bilanc të 100% ndaj Real Madridit apo do të ndalet nga trajneri i ri i ‘Los Blancos’, Zinedin Zidane.
