Nga Emili Bibolli
Struktura e Posaçme Kundër Korrupsionit dhe Krimit të Organizuar (SPAK) dhe GJKKO kanë luajtur një rol të rëndësishëm në forcimin e sundimit të ligjit dhe luftën kundër korrupsionit në Shqipëri. Arritjet e tyre janë të pamohueshme dhe kanë krijuar një precedent të ri në raport me ndëshkimin e figurave të larta që kanë abuzuar me pushtetin në 34 vitet e tranzicionit të stërzgjatur.
Megjithatë, veprimet e këtyre institucioneve duhet të mbështeten gjithmonë në respektimin e protokolleve ligjore, normave të Kushtetutës dhe duke iu përmbajtur respektimit të të drejtave themelore të individit.
Arrestimi i Erion Veliajt ka ngjallur debate të forta në opinionin publik, jo vetëm për faktin se ai është një figurë kyçe në Partinë Socialiste dhe një kryetar bashkie me një bilanc pune shumë të njohur për transformimin e Tiranës, por edhe për mënyrën sesi është trajtuar çështja. Rasti i tij nuk duhet të përzihet me thashetheme apo detaje të cilat nuk kanë lidhje direkte me përgjegjësitë e tij institucionale. Në një shtet të së drejtës, asnjë individ nuk mund të mbahet në burg mbi bazën e perceptimeve apo veprimeve të dikujt tjetër.
Për këtë arsye, SPAK dhe GJKKO duhet të vazhdojnë punën e tyre me integritet dhe profesionalizëm, duke u siguruar që çdo masë e marrë të jetë në përputhje me ligjin dhe të mos ngjallë dyshime për selektivitet, anshmëri, standarde të dyfishta apo tejkalim të kompetencave. Drejtësia e vërtetë nuk funksionon mbi bazën e spektaklit mediatik, por mbi prova të pakundërshtueshme dhe një proces të drejtë ligjor.
Gjithashtu, standardi është thelbësor për besueshmërinë ndaj këtyre institucioneve, e kjo e fundit nuk duhet të cenohet. Sali Berisha i akuzuar pak kohë më parë mori lirinë. Erjon Veliaj i dyshuar u burgos dhe vazhdon të mbahet në burg. Për të mos harruar pastaj rastet kur kryebashkiakë nën akuzë për shpërdorim detyre dhe me fakte mbi tavolinë janë shpallur të pafajshëm. Apo gjithashtu një tjetër kryebashkiak i dënuar nga GJKKO me burg, i cili vijon të ushtrojë detyrën, të firmosë vendime, punësime, shkarkime, tendera.
Ndërkohë nga ana tjetër ndeshemi edhe me kërcënimet apo presionet që po u bëhen institucioneve të drejtësisë nga politika (së cilës për herë të parë i janë dridhur fort themelet), por edhe nga disa media pa pikë integriteti dhe profesionalizmi. Këto forma janë shumë të turpshme dhe të gabuara. Gjuha e të fortëve, presionet apo denigrimi nuk janë mënyra e duhur, e aq më tepër karshi institucioneve të drejtësisë, të cilat në fund të fundit janë produkt i reformës së miratuar e votuar nga të dyja palët si PS dhe PD!
Nëse faktohet gjithçka që po qarkullon për gjyqtarin Erion Bani apo prokurorin Ols Dado, nga konflikti i interesit, lidhjet me z.Berisha e deri tek emërimet në kundërshtim me ligjin, shkarkimi i tyre duhet të jetë i menjëhershëm ose, së paku të dorëhiqen nga çështja e z.Veliaj në mënyrë që procesi të mos konsiderohet i kompromentuar që në krye të herës. Por nëse ndodh e kundërta, atëherë linçimi i tyre duhet të marrë fund një orë e më parë! (Shqip.com)
