Nga Artur Ajazi
Veprimtaria e SPAK-ut, e deritanishmja, të bën të mendosh se, ajo strukturë e re e drejtësisë, ka zëvëndësuar realisht opozitën në Shqipëri. Jo vetëm se po “gjuan gjithmonë majtas”, por se rezultatet, dhe atë ç’ka ka arritur dhe pritet të arrijë, tregojnë se, ka nxjerrë jashtë funksioni “boshtin opozitarist”. Edhe pse Berisha shprehet (ndoshta me rezervë) se “SPAK-u është SKAP-i Partisë, levë e Ramës”, etj, rezultatet dhe ajo çfarë ka ndodhur deri sot, tregojnë të kundërtën.
Drejtësia e re, ishte premtimi më dinjitoz i kryeministri Edi Rama. Dhe e bëri. Ashtu siç ka bërë dhe po bën realitet edhe rrugët kombëtare, qytetet, pastrimin dhe higjenizimin e tyre (mjafton të shikosh Shkodrën si po rilind pas 14 Majit) Edi Rama veprën më madhore në këtë vend, ka arritur të bëjë duke rinovuar dhe ringritur drejtësinë e re nga themelet. Drejtësia e re, mbetet ëndërra e çdo shqiptari që ka vuajtur dhe ka akoma mllefe ndaj abuzimit me pronat në prokurori dhe gjykata, paratë publike, investimet, apo dhe vendimet skandaloze gjyqsore antiligjore të “plepaxhinjve” të Partisë Demokratike.
Por le të kthehemi tek SPAK-u. Kjo strukturë solide, sot mbetet “tmerri” i zyrtarëve dhe ish-zyrtarëve të korruptuar, të inkriminuar, dhe atyre që kanë shkelur ligjin duke mbushur thasët me para qytetarësh. E ndërsa “Doktori” i mbante “nën sqetull” njerëzit e tij, Edi Rama (dhe PS) nuk pranon kurrë të bëhet avokatia e asnjë ministri, zv.ministri, deputeti apo drejtori që shfrytëzon postin dhe simbolet e Partisë Socialiste, për të vjedhur dhe shkatërruar imazhin politik të partisë tij. SPAK-u, ka sot mbështetjen e kryeministrit Rama, duke e inkurajuar atë në çdo reagim dhe kërkesë-veprim ligjor ndaj kujdo që zbulohet se ka shkelur ligjin apo ka vjedhur përmes marifeteve të tjera duke abuzuar me postin.
Opozita e sot (PD dhe levat e saj) mbetet apatike, kaotike, mosbesuese, ndaj mendoj se SPAK-u ka zëvëndësuar de facto rolin e saj në skenën politike shqiptare. Fjalë, akuza boshe, denoncime të stisura, dhe thirrje irrituese në salla Parlamenti apo selie partish, janë realisht ato ç’ka bën opozita e sotme. Shumë zhurmë për asgjë. Rastet e abuzimit me gjoja “fakte dhe dosje penale”, thjesht për efekte elektorale, janë hedhur poshtë në dhjetra e dhjetra raste, nga strukturat e drejtësisë së re. Në Shqipëri ka ardhur koha të bëhet politikë, drejtësi, zhvillim, dhe gjithçka tjetër, në frymën e një mendësie të re, duke hedhur mbrapa të shkuarën e 32 viteve “tranzicion” kur shkatërruam gjithçka të vyer njerëzore.
Humbja e besimit tek një pjesë e mirë e politikanëve, dhe shprehja e optimizmit se “drejtësia e re po rizgjon shpresën e madhe tek shqiptarët”, do të sjellë patjetër ndryshimin e madh në Shqipëri. SPAK-u, dhe jo vetëm ai, shihen si burim i madh shprese për të goditur nga themelet të keqen në politikë, duke ndezur “dritën në fund të tunelit” për të ardhmen e shqiptarëve. Ndaj mendoj se bashkë me goditjen e korrupsionit dhe sferave më të larta të politikës, ajo strukturë e re e drejtësisë re, po bën në mënyrë perfekte edhe rolin e “opozitës reale ” ndoshta në mënyrë të pavetëdijshme.
