Kryetari i Partisë Agrare Ambientale (PAA), Agron Duka, i ftuar në studion e News24 me gazetaren Ola Bruko, shprehu shqetësimin për situatën politike në vend në prag të zgjedhjeve të 11 majit.
Duka theksoi se pjesa më e madhe e votuesve janë pensionistë dhe akuzoi politikën për lidhje të forta me krimin.
“Nuk ka pasur asnjëherë lidhje kaq të forta mes politikës dhe krimit. Shkëputi bandat dhe bëj zgjedhje të lira. Le të fitojnë pastaj. Por nëse vijojnë me të njëjtin ritëm, kjo nuk ndodh,” tha ai.
Ai kërkoi që SPAK të fillojë punën në mënyrë efektive, duke theksuar se nuk është e mjaftueshme të deklarohet krijimi i një strukture për të kapur individë që ofrojnë ndihma ushqimore në kuadër të luftës ndaj krimit zgjedhor.
“Nëse SPAK do krijojë një strukturë për të kapur ndonjë me ndihma ushqimore që ta quajë ndikim në zgjedhje dhe ta fusë në burg, nuk ka bërë gjë. Të shkëpusë rrënjët e krimit,” shprehu Duka.
Ai e theksoi se nga Partia Demokratike kanë dalë disa figura me ndikim dhe se do të përpiqen të minimizojnë dëmin nga emrat që janë larguar, duke grumbulluar rreth PD partitë aleate.
“Nga PD kanë dalë disa figura që nuk janë pa ndikim. Do mundohemi të minimizojmë dëmin. Do mundohemi të grumbullojmë rreth PD partitë aleate që nuk janë pak. Do përpiqemi të minimizojmë dëmin nga emrat që janë larguar dhe të bashkohemi në çdo qark dhe të konsiderojmë që kundërshtari ynë është PS”, tha ai.
