Ministrja e Drejtësisë Etilda Gjonaj i është përgjigjur presidentit Ilir Meta menjëherë pasi presidenca bëri publike kallëzimin për atë dhe dy zyrtarë të tjerë në SPAK.
“Sikur të mos i mjaftonte politika e dëshpëruar e dhunës verbale, sot Kreu i Shtetit ka gjetur kohën të paraqitet personalisht me të gjithë stafin e tij në zyrën e sekretarisë të SPAK, për të dorëzuar një kallzim penal ndaj meje dhe stafit tim.
Në respekt të Kushtetutës dhe pozicionit tim zyrtar me Presidentin, reagimi im do të jetë institucional kundrejt akteve të tij. E siguroj se jam gati t’i përgjigjem jo vetëm SPAK-ut ligjërisht po dhe atij vetë publikisht, institucionalisht dhe ligjërisht, me kulturë dhe etikë.
Pavarësisht absurditetit të kësaj historie, mbetet me rëndësi që Presidenti ka bërë hapin e duhur, njohjen e institucioneve e reja të Reformës në Drejtësi të cilën ai u lodh aq shumë duke e luftuar dhe përbaltur atë dhe cilindo që punon me të, shqiptarë dhe ndërkombëtar.
Shpresoj që të pranojë punën e tyre edhe ditën kur drejtësia e re dhe SPAK të fillojë të godasë në shenjat e njohura botërisht si njolla të Shqipërisë, politikanë dhe zyrtarë të lartë të njohur për korrupsionin dhe krimet e tyre në këtë vend. Koha që drejtesia të veprojë!”
/a.r
