Prokurori i Posaçëm ka paraqitur në Gjykatën e Posaçme kundër Korrupsionit dhe Krimit të Organizuar (GJKKO) pretencën për tre të pandehurit e fraksionit të veçuar të dosjes “Meta”. Për shkak të kërkesës së tyre për t’u gjykuar me procedurë të shkurtuar, çështjet në ngarkim të Fatime Kryemadhit, Ema Çokut dhe Pirro Xhixhos u ndanë nga pjesa tjetër e procesit kryesor.
Gjatë seancës, prokuroria kërkoi një dënim total prej 19 vitesh burg për të tre të pandehurit, duke specifikuar se për shkak të gjykimit të shkurtuar dhe rrethanave specifike, dënimet e tyre propozohen të pezullohen dhe të konvertohen në shërbim prove.
GJKKO rrëzon kërkesën e Fatime Kryemadhit
Përpara leximit të konkluzioneve të Prokurorisë së Posaçme, mbrojtja e Fatime Kryemadhit paraqiti një kërkesë procedurale për të ndryshuar rrjedhën e gjykimit.
Fatime Kryemadhi përmes dy avokateve mbrojtëse kërkon të tërhiqet nga kërkesa për gjykim të shkurtuar dhe çështja në ngarkim të saj të bashkohet me Ilir Metën dhe Monika Kryemadhin.
Megjithatë, trupi gjykues i GJKKO-së e ka rrëzuar këtë kërkesë të mbrojtjes, duke vendosur vazhdimin e procesit të veçuar dhe duke i hapur rrugë leximit të pretencës nga prokurori.
Pretenca e detajuar e SPAK-ut për të pandehurit
Akuzat dhe masat e dënimit të kërkuara nga Prokuroria e Posaçme për secilin prej të pandehurve janë specifikuar sipas roleve dhe veprave penale përkatëse:
Fatime Kryemadhi
Akuzohet për veprën penale “Pastrim parash”. SPAK kërkoi dënimin e saj me 7 vite burg, që për shkak të gjykimit të shkurtuar ulet në 4.8 vite. Për shkak të moshës, prokuroria kërkoi pezullimin e ekzekutimit të dënimit dhe vendosjen e saj në shërbim prove për një periudhë 5-vjeçare. Gjithashtu, është kërkuar konfiskimi i një banese në pronësi të saj.
Ema Çoku
Akuzohet gjithashtu për veprën penale “Pastrim parash”. SPAK kërkoi dënimin e saj me 7 vite burg, që me aplikimin e gjykimit të shkurtuar zbret në 4.8 vite. Prokuroria kërkoi që ky dënim t’i pezullohet dhe të konvertohet në 5 vite shërbim prove.
Pirro Xhixho
Ish-kreu i AKEP-it akuzohet për veprën penale “Korrupsion pasiv në bashkëpunim”. Për të u kërkua shpallja fajtor dhe dënimi me 4 vite burg. Përmes procedurës së shkurtuar, dënimi ulet në 3 vite burg dhe prokuroria propozoi pezullimin e tij, duke e kaluar në 4 vite shërbim prove me kusht.
Pas leximit të pretencës nga prokurori, avokatët mbrojtës të të pandehurve kanë kërkuar kohë shtesë nga gjykata për të përgatitur konkluzionet e tyre mbrojtëse. Trupi gjykues e pranoi kërkesën dhe caktoi seancën e radhës për këtë proces më datë 27 korrik, në orën 12:00.
