Deputeti i Partisë Demokratike Edmond Spaho deklaroi sot për News24 se nuk mund të ketë reforma dhe institucione demokratike pa zgjedhje të lira.
Duke iu përgjigjur akuzave nga maxhoranca se PD do të bllokojë vettingun Spaho tha se kontributi i kësaj force në reformën në drejtësi ka qenë i rëndësishëm dhe pa mbështetjen e opozitës ndryshimet kushtetuese nuk do të ishin miratuar.
“Ju e keni ndjekur historinë e reformës në drejtësi për 2 vjet. PD ka qenë mbështetëse dhe ka kërkuar të jetë gjithëpërfshirëse dhe në përputhje me Komisionin e Venecias. Kontributi i PD, esencial e cilësor në përbërje, në ato çka u definuan si pjesë e reformës në drejtësi. Në dy materiale që u konfirmuan nga Komisioni i Venecias kontributet e PD ishin shumë të rëndësishme. Pas miratimit të ndryshimeve kushtetuese, maxhoranca theu marrëveshjen që 7 ligjet që do të shoqëronin ndryshimet kushtetuese do të miratoheshin me konsensus. Vetëm SPAK-u u miratua me konsensus. Në mendimin e PD-së nuk mund të pretendojmë të zhvillojmë reforma dhe të ngremë institucione demokratike sa kohë zgjedhjet e kanë burimin në zgjedhje të manipuluara Ndaj gjithë fokusin e kemi zhvendosur që në qershor të ketë zgjedhje të lira dhe të ndershme”, theksoi Spaho.
I pyetur se çfarë skenarësh mund të ketë seanca e sotme ku nuk do të marrë pjesë opozita, Spaho tha se këto veprime mund të ndërmerren vetëm nga një maxhorancë e Ramës dhe e Metës që shikon formën dhe jo përmbajtjen.
“Për PD-në, rëndësi ka që vendit t’i garantohen zgjedhje të lira dhe të ndershme. Reformat e deritanishme janë fasadë. Farsa të tilla si kjo që duan të bëjnë sot tregojnë fytyrën e vërtetë të kësaj qeverisjeje. Rama nuk është i interesuar për të bërë reformë për qytetarët por të kapë sistemin”, deklaroi ai.
Spaho theksoi se opozita është e vendosur për zgjedhje të lira dhe nuk do të lejojë farsë me zgjedhjet e qershorit.
“Ne jemi të vendosur: o do ketë zgjedhje të lira dhe të ndershme në qershor ose nuk vazhdojmë me një farsë. Ne nuk na intereson një çështje e vetme por shumë. Me Ramën dhe 20 kriminelët e tij në Kuvend nuk bëhet proces vettingu. Edhe ndërkombëtarët po vijnë në qëndrimin e PD-së që në radhë të parë të ketë zgjedhje të lira dhe të ndershme”, tha Spaho./a.m.
