Ambasadori amerikan në Tiranë, Donald Lu rinisi dje angazhimet në kuadër të miratimit të reformës në drejtësi. Gjatë ditës së djeshme z.Lu zhvilloi takime me kreun e opozitës, Lulzim Basha dhe më pas i shoqëruar edhe nga ambasadorja e BE, Romana Vlahutin në orën 16:00 u takuan me kreun e Kuvendit, Ilir Meta. Me z.Basha biseduan rreth një orë dhe takimi me të u bë pasi deputeti demokrat, Arben Ristani, dorëzoi në Kuvend paketën e amendamenteve të reja për ligjin e vetingut.
Palët nuk kanë pranuar të japin të dhëna mbi çështjet e diskutuara, por burime nga Partia Demokratike konfirmuan se në fokus ka qenë drafti me amendamentet që do të paraqitet sot në orën 17:00 në Kuvend, përgjatë një seance maratone. Demokratët e kanë bërë të qartë se nuk do ta votojnë këtë ligj në formën që u miratua në Komisionin e Posaçëm të Reformës në Drejtësi. Ambasadorët po tentojnë sërish për arritjen e një konsensusi, por duket se gjasat janë drejt zeros në seancën e sotme të jashtëzakonshme.
Projektligji i ri “Për rivlerësimin kalimtar të prokurorëve dhe gjyqtarëve” do të miratohet sot, më 30 gusht, në një mbledhje të jashtëzakonshme të parlamentit. Projektligji i vetingut mund të kalojë dhe pa votat e opozitës, pasi ai kalon vetëm me 84 vota, të cilat mazhoranca, PS-LSI-PDIU i ka të sigurta.
Demokratët e kanë bërë të qartë se nuk do ta votojnë këtë ligj në formën që u miratua në Komisionin e Posaçëm të Reformës në Drejtësi. Sipas tyre, drafti është antikushtetues. Edhe mazhoranca, e unifikuar kësaj, here ka qenë e qartë po ashtu se projektligji do të miratohet në seancën e pasdites së martë, me apo pa votat e opozitës. Por, kanë lënë të hapur mundësinë që nëse demokratet arrijnë të marrin miratimin e ekspertëve të EURALIUS dhe OPDAT për amendamentet që kanë propozuar për draftin, ata do t’i votojnë. Mesditën e sotme demokratët dhe socialistët do të mbledhin grupet parlamentare për të vendosur për qëndrimin që do të mbahet në seancë, e cila mund të zgjasë deri pasmesnate.
Mësohet se nga PS-ja do të diskutojnë 20 deputetë, ndërkohë që PD-ja do të vendosë sot për emrat e diskutantëve në seancë gjatë mbledhjes së sotme të grupit parlamentar. Projektligji i vetingut është cilësuar si një nga më të rëndësishmit nga partnerët ndërkombëtarë, të cilët kanë kërkuar që të miratohet brenda gushtit, në mënyrë që të mos digjen fondet e parashikuara për të financuar procesin e rivlerësimit. Por, miratimi i ligjit të shumëdebatuar kaloi javën e shkuar vetëm me votat e mazhorancës, pasi opozita nuk pranoi ta votojë atë nën për nen. Gjatë mbledhjes së fundit të Komisionit të Posaçëm të Reformës në Drejtësi, opozita kishte përgatitur një draft me rreth 40 amendamente për projektligjin e vetingut, por ato nuk u pranuan nga anëtarët e maxhorancës dhe i rrëzuan një nga një.
Ky fakt bëri që opozita të mos votojë projektligjin në tërësi, duke deklaruar se në nenet e tij shkelet Kushtetuta e vendit. Partia Demokratike po përgatit një draft të ri me amendamente ligjore për projektligjin e vetingut, për të cilat do të kërkojë të miratohen në seancën e së martës. Nga ana tjetër, gjatë mbledhjes së Konferencës së Kryetarëve, Ilir Meta kërkoi nga mazhoranca dhe opozita që të shfrytëzojnë ditët para seancës për të gjetur konsensus, duke thënë se tashmë palët janë mësuar me rastet e gjetjes së dakordësisë edhe në orët e fundit./bw/r.a
