Në kryeqytetin e Koresë së Veriut ndalohet të vdesësh ose të martohesh, të paktën gjatë ditëve të ardhshme. Duket si shaka, por është e vërtetë. Regjimi komunist ka ndaluar funeralet dhe martesat në Phenian ndërsa partia që drejton vendin po përgatitet për kongresin.
Partia e Punëtorëve, e drejtuar nga diktatori Kim Jong-un, mbledh Kongresin e saj për herë të parë pas 36 vitesh pikërisht sot. Lëvizja e lirë për të hyrë ose për të dalë nga qyteti është ndaluar dhe në vend kanë nisur inspektimet për të garantuar sigurinë.
Masat e përkohshme shihen si një përpjekje për të parandaluar incidentet gjatë Kongresit, bëri të ditur një zyrtar vendas. Kongresi i fundit i partisë komuniste që drejton vendin është mbajtur në vitin 1980, kohë kur babai i Kim Jong-unit, Kim Jong-il, u konfirmua si pasuesi i themeluesit të shtetit, Kim Il-sung.
Diktatori aktual, Kim Jong-un, 33 vjeç, pritet që ta shfrytëzojë këtë kongres për të çimentuar pozicionin e tij në drejtimin e vendit, të deklarojë Korenë e Veriut një shtet bërthamor dhe të paraqesë vizionin e tij për ekonominë dhe potencialin ushtarak të Koresë së Veriut.
Dita/d.i.
