Sot në orën 20:45, i jepet fund deklaratave dhe tensioneve, ndërsa fjalën e merrë fusha e blertë, aty ku Shqipëria dhe Serbia do të zbresin në ndeshjen më historike dhe më vendimtare për kombëtaren kuqezi.
Masat e sigurisë të marra për garantimin e kësaj ndeshje janë mjaft të forta, njëlloj me vizitat e zyrtarëve të lartë si ish-Presidentit amerikan George W. Bush dhe Papa Françeskut vjeshtën e kaluar.
Po ashtu do të bllokohen edhe mjaft akse rrugore ku nga ora 12:00-19:00 në kryeqytet, do të bllokohet segmenti rrugor nga rruga “Dervish Hima” deri te “Rruga e Elbasanit”. Për mbarëvajtjen e aktivitetit do të ndalohet qarkullimi në tunelin e Elbasanit. Tuneli do të qëndrojë i mbyllur deri në përfundim të aktivitetit sportiv në qytetin e Elbasanit. Pas orës 12:00, qarkullimi do të jetë i ndaluar edhe nga qafa e Kërrabës. Praktikisht, të gjitha rrugët që lidhin Tiranën me Elbasanin do të jenë të mbyllura, prandaj tifozët kryeqytetas do të duhet të shkojnë në Elbasan nga Durrësi.
Hyrja e sportëdashësve do të fillojë në orën 16:30 dhe do të mbarojë në orën 20:15, me qëllim shmangien e radhëve të gjata në hyrje për në stadium. Për të gjithë tifozët që kanë prerë biletat për të parë ndeshjen në stadium do të lejohen vetëm këto veshje: Shalli me flamurin kuq e zi; Bluza, ose shalle të stampuara vetëm me flamurin dhe simbolet “Kuq e Zi”; Flamuri kombëtar dhe asnjë banderolë tjetër; Shalli me mbishkrimin “Plisat”. Gjithashtu policia bën me dije se nuk do të lejohen banderola me mbishkrimin “Shqipëria Etnike”; asnjë bluzë ose shall me simbolet e Kosovës; asnjë bluzë ose shall me mbishkrimin “Harta Etnike”; asnjë bluzë ose shall me mbishkrimin “Shqipëria Autoktone”; Asnjë bluzë ose shall me mbishkrimin e ndonjë heroi të Kosovës; në hyrje të stadiumit do të kontrollohen të gjithë sportdashësit.
