Sot është një ditë e veçantë për mësuesit të cilët kremtojnë festën e tyre. Ajo që njihet si festa e mësuesit ka një historik të veçantë dhe përkon me 7 Marsin e vitit 1887, dita kur u hap mësonjtorja e parë në Korçë.
Pandeli Sotiri ishte mësues dhe drejtor i parë i këtij institucioni. Kjo përbën një ngjarje historike për popullin shqiptar që deri në atë ditë, mësimin e bënte fshehtas nëpër shtëpi pasi pushtuesi osman nuk e lejonte.
Kështu që nga ajo ditë 7 marsi festohet në Shqiperi si dita e mësuesit për të përkujtuar atë ngjarje të rëndësishme historike dhe kulturore, por edhe për të vlerësuar kontributin e mësuesit në shoqërinë shqiptare.
Në përkujtim të krijimit të Mësonjëtores së parë shqipe me vendim të Qeverisë Shqiptare në vitin 1960 u vendos që 7 Marsi të njihet si “Dita Kombëtare e Mësuesve”.
Sot 7 Marsi kremtohet nga të gjithë shqiptarët, nxënësit në mbarë vendin, në shenjë vlerësimi të traditave më të mira të shkollës kombëtare shqipe, të figurës së nderuar të mësuesit si edukator i brezit të ri.
Redaksia e JavaNeës i uron të gjithë mëseusve gëzuar “Ditën Kombëtare të Mësuesit”./a.m.
