Sipas një ekuacioni matematikor, shumë të dashur nga anglezët, e hëna e tretë e janarit, sjell depresion dhe trishtim. Për të kaluar këtë moment këshillohet të merreni me sport apo të qëndroni në shtëpi, pranë njerëzve të familjes
Sot është “E hëna blu” (e hënë, 16 janar) ose dita më e trishtuar e vitit, që qëllon gjithnjë të hënën e tretë të muajit janar.
Origjina e kësaj “feste” kaq melankolike është Anglia dhe duhet kërkuar në një ekuacion matematikor – ngritur disa vite më parë nga një psikolog anglez, Cliff Arnall. Kushtet jo të mira meteorologjike, ditët e shkurtra, festat e fundvitit tashmë janë lënë pas krahëve, ndjesia e fajit se keni shpenzuar shumë para gjatë festave ose se keni ngrënë shumë, rifillimi i punës me ritme frenetike, janë disa nga shpjegimet që jep Arnall.
Në Britaninë e Madhe, për shembull, “E hëna blu” merret mjaft seriozisht, sa që pikërisht në këtë ditë rritet numri i personave që nuk shkojnë në punë.
“Një traditë angleze”
Varje turinjsh për gjithë ditën apo për gjithë javën, por për shumë është rasti ideal se si të ngresh lart moralin: që nga agjencitë e udhëtimit, tek ofertat që s’mund t’i humbni kurrsesi dhe deri tek ushqimet që duhet të konsumoni. Të entuziazmuar janë veçanërisht britanikët, ku thuhet se pikërisht në Britaninë e Madhe ka lindur tradita “e së hënës blu”, nga një fushatë e një kompanie udhëtimesh e cila dëshironte të nxiste udhëtimet në fund të janarit. Me pak fjalë, një gjetje publiciteti.
Dita më e lumtur
Ndërsa për ditën më të lumtur të vitit duhet të presim deri në qershor. Të njëjtët analistë kanë përllogaritur se “dita më e lumtur” bie rreth solsticit të verës, mes 21 dhe 24 qershorit./TO/a.m.
