Çdo vit, më 31 maj, OBSH dhe partnerët me rastin e Ditës Botërore Pa-Duhan, theksojnë rreziqet shëndetësore lidhur me përdorimin e duhanit.
Në kuadër të kësaj dite, OBSH dhe Sekretariati i Konventës Kornizë të OBSH-së për Kontrollin e Duhanit janë duke bërë thirrje që, çdo palë të miratojë dhe zbatojë masa efektive për një paketim të thjeshtë (standard) të produkteve të duhanit.
Në faqen zyrtare të ISHP-së thuhet se paketimi i thjeshtë zvogëlon atraktivitetin e produkteve të duhanit dhe është një masë e rëndësishme për uljen e kërkesës dhe kufizon përdorimin e paketimit të duhanit si një formë e reklamimit të duhanit dhe promovimit, me mjete fallco, mashtruese, zhgënjyese ose që ka të ngjarë të krijojnë përshtypje të gabuara për karakteristikat e tij.
Sipas Institutit të Shëndetit Publik, paketimi i thjeshte i produkteve të duhanit rrit efektivitetin e paralajmërimeve shëndetësore.
“Paketimi i thjeshtë nuk promovon një produkt duhani me mjete fallco, mashtruese, zhgënjyese ose që ka të ngjarë të krijojnë përshtypje të gabuara për karakteristikat e tij, efektet shëndetësore, rreziqet dhe/ose dëmtimet, duke përfshirë çdo term, përshkrim, shenjë dalluese, shenjë figurative ose ndonjë shenjë tjetër që në mënyrë direkte ose indirekte krijon një përshtypje fallco që një produkt i veçantë duhani është më pak i dëmshëm se prodhimet e tjera të duhanit’, nënvizon ISHP.
Konventa Kornizë për kontrollin e Duhanit në udhëzimet për nenet 11 dhe 13, rekomandon palët të miratojnë dhe zbatojnë, paketimin e thjeshtë si pjesë e një qasje gjithëpërfshirëse multisektoriale për kontrollin e duhanit.
“Paketimi gjenerik” nënkupton që të gjitha paketat e duhanit të duken njësoj sepse edhe germat “font-i”, do të jenë të detyrueshme të jenë të njëjtat për çdo lloj pakete, por i vetmi ndryshim është emri i markës tregtare, pra ose Marlboro ose Kent ose Camel.
