Është përkujtuar ditën e sotme me rastin e 5 Majit Ditës së Dëshmorëve të Atdheut, të rënët gjatë Luftës Antifashiste Nacional Çlirimtare.
Fillimisht opozita dhe më pas mazhoranca kanë qenë në “Varrezat e Dëshmorëve” ku kanë parakaluar dhe kanë vendosur kurora me lule në monumentin “Nënë Shqipëri”, në përkujtim të të rënëve në Luftën për çlirimin e Atdheut.
Kryeministri Edi Rama, Kryetari i Kuvendit Ilir Meta, ministrat dhe i gjithë kabineti qeveritar kanë parakular me radhë duke nderuar dëshmorët dhe vendosur kurora me lule në monumentin “Nënë Shqipëri”.
Në fjalën e tij, kandidati i PS për Bashkinë e Tiranës, Erion Veliaj ka ftuar gjeneratat e sotme që të mbajnë mend dëshmorët që sakrifikuan jetën, “pasi vetëm kështu do të mund të jenë në gjendje të zgjedhin rrugën e duhur ndaj asaj të gabuar”.
Ndërsa kreu i Kuvendit, Meta është shprehur se pa sakrificën e dëshmorëve Shqipëria nuk do të ishte ajo që është sot, anëtare e NATO-s dhe aspirante për t’iu bashkuar familjes evropiane.
“Përkulemi me mirënjohje për kontritubtin e tyre të jashtëzakonshëm për lirinë e vendit. Pa sakrificën e tyre sublime Shqipëria sot nuk do të ishte ajo që është. Shqiptarët i pritën me armë fashizmin dhe nazizmin, duke i dhënë një mesazh të qartë Evropës. Sot jemi krenarë që jemi anëtarë të NATO-s, që jemi kandidat për në BE dhe në themelet e kësaj Shqipërie euro-atlantike dhe evropiane është ëndrra e Qemal Stafës dhe dëshmorëve të rinj që dhanë jetën e tyre”, tha Meta.
Edhe kryeministri Edi Rama shprehu mirënjohjen për të gjithë të rënët e luftës.
“Dita e Dëshmorëve të atdheut përbën një ditë të veçantë. Qemal Stafa mbetet figura e një gjenerate që iu kundërvu një hordhie shkatërruese, që u lëshua në Shqipërinë e vogël me gjithë egërsinë e tij, por që ndeshi gjithë forcën e rezistencës dhe atdhedashurisë. 5 Maji i sotëm përkon me 70-vjetorin e fitores mbi fashizmin. Shqipëria u rreshtua në anën e duhur të historisë, të cilën e shkruan mijëra vajza e djem shqiptarë, që kishin vetëm një armë përballë armiqve që kishin ardhur me armët më moderne të atëhershme”, tha Rama.
Duke nderuar të rënët, kreu i ekzekutivit ka theksuar se, pavarësisht vështirësive që ka kaluar ndër vite, qeveria e tij vit pas viti do ta çojë Shqipërinë në drejtimin e duhur.
“Ne sot jemi krenarë për faktin që s’kemi ngelur symbyllur përpara problemeve të trashëguara, po shënojmë kthesën e Shqipërisë në drejtimin e duhur”, tha ai.
5 Maji, PD përkujton dëshmorët
Partia Demokratike ka përkujtuar ditën e sotme me rastin e 5 Majit, Dita e Dëshmorëve të Atdheut, të rënët në luftën antifashiste. Në një ceremoni zyrtare homazhesh drejtuesit e lartë të Partisë Demokratike, bënë homazhe dhe vendosën kurora pranë monumentit “Nënë Shqipëri”, në përkujtim të të rënëve në Luftën për çlirimin e Atdheut.
Kryedemokrati Basha, ish-kryeministri Sali Berisha por edhe kandidati për Bashkinë parakaluan me nderim dhe vendosën kurora. Në një deklaratë për gazetarët, kryetari i PD Lulzim Basha, tha se jemi sot këtu për të nderuar dhe përkulur me nderim para atyre që zgjodhën flijimin në emër të idealeve të larta të lirisë. Por lideri i opozitës Lulzim Basha nuk i ka lënë deklaratat elektorale as në këtë ditë, kur në fjalimin e rastit për mediat pas ceremonisë kërkoi votën e qytetarëve për të larguar qeverinë.
“Sot rikthehemi në këtë altar të lirisë kombëtare për të kujtuar çmimin e lartë të saj dhe për të përkujtuar ata që dhanë jetën e tyre për lirinë. Liria është vlera më e shtrenjtë për të cilën luftojnë kombet dhe njerëzit. Shumica dërrmuese e dëshmorëve të atdheut, të atyre që u flijuan në emër të lirisë, ishin të rinj. Ata patën një zgjedhje, një zgjedhje më të rëndë se ato që ka rinia sot: të flijoheshin për liri. Edhe ne sot kemi një zgjedhje, të forcojmë dhe mbrojmë lirinë e qytetarëve për t’u shprehur, për të votuar dhe për të larguar me votë qeverinë. 5 Maji është ditë thirrjeje për çdo shqiptar që të bëjë zgjedhjen e duhur për vete dhe familjen, duke nderuar sakrificën e dëshmorëve”, – u shpreh kryetari i Partisë Demokratike Lulzim Basha.
Redaksia Online
(JavaNews.al)
