Partia Socialiste do të festojë sot ditëlindjen e 25-të të saj, me një ceremoni të vonuar që duhet të ishte bërë në 12 qershor të këtij viti. Festa e shtyrë për shkak të Kampionatit Evropian dhe pjesëmarrjes historike të Shqipërisë do të zhvillohet sot, në orën 19, në ambientet e pasme të Selisë Qëndrore të Partisë Socialiste.
Në këtë takim brezash është parashikuar një fjalim nga Kryetari i Partisë, Edi Rama dhe më pas një shkëmbim miqësor mes të ftuarve. Më pas, zemrën e kësaj feste, pritet ta përbëjë një darkë e thirrur nga Edi Rama për kabinetin qeveritar, grupin parlamentar, kryetarët, sekretarët e përgjithshëm, nënkryetarët, sekretarët organizativë, kryetarët e partive të koalicionit, në një prej restoranteve të njohura në qendër të Tiranës raporton Shqiptarja.
Një prej organizatorëve të festës, deputeti Musa Ulqini sqaroi dje për mediat, se janë ftuar të gjithë drejtuesit që prej vitit 1991 e deri më sot, përfshirë këtu ish-deputetë, ish-anëtarë kryesie, ish-presidentë dhe ish-kryetarë parlamenti.
Ftesa i ka shkuar edhe ish-kryetarit Fatos Nano, ndërkohë që ftesë nominale kanë marrë deputetët e LSI-së dhe të PDIU-së, si dy parti në koalicion. Nga PD-ja janë ftuar kryetari, Lulzim Basha si dhe nënkryetari i Kuvendit, Edmond Spaho.
Ndërkohë BW shkruan se në festë do mungojë kreu i Kuvendit, Ilir Meta, njëherazi kreu i LSI-së, i cili sot niset për një vizitë zyrtare në Malin e Zi./a.m.
