Ministri i Jashtëm Ditmir Bushati ka përkujtuar 22-vjetorin e masakrës së Srebrenicës. Përmes një statusi në facebook ai nënvizon se duhet reflektim mbi situatën e sigurisë.
“Edhe pse ato vite të errëta duken larg, edhe pse po shuhen pak nga pak aktorët e luftës së atëhershme duke ja lënë vendin promotorëve të paqes së brishtë, është detyra jonë të kujtojmë dhe të nderojmë viktimat”, shkruan mes të tjerash Bushati.
Statusi:
Sot është 22 vjetori i një prej ngjarjeve më të tmerrshme në historinë e Europës. Mijëra gra, burra e fëmijë u masakruan dhe u dhunuan në Srebrenicë nga makineria gjenocidare serbe.
Edhe pse ato vite të errëta duken larg, edhe pse po shuhen pak nga pak aktorët e luftës së atëhershme duke ja lënë vendin promotorëve të paqes së brishtë, është detyra jonë të kujtojmë dhe të nderojmë viktimat.
Dhe mënyra më e mirë për ta bërë këtë është të reflektojmë sinqerisht dhe pa kompromise mbi situatën aktuale të sigurisë dhe të bashkëpunimit në rajon dhe në Europë. Ky ishte thelbi i mesazhit tim sot në Ministerialin e OSBE-së, një organizatë që po vuan pasojat e mungesës së besimit në mekanizmat e bashkëpunimit të vendeve anëtare.
Vendet e BE-së dhe të Ballkanit Perëndimor nuk e kanë luksin të humbasin besimin tek perspektiva zhvillimore që ofron paqja në Europë. Historia na mëson se siguria e vërtetë nuk arrihet përmes stabilokracisë por duke vënë zhvillimin dhe dinjitetin në krye të politikës Europiane për rajonin. Kjo është sfida e Samitit të Ballkanit Perëndimor që do të mbahet nesër ne Trieste. Dhe e vetmja mënyrë që të mos rikthehen më ato vite të errëta.
