Kombëtarja shqiptare zbret sonte në fushë në San Marino, me objektivin e qartë për të marrë fitoren e dytë radhazi në Ligën e Kombeve.
Pas suksesit 2-0 ndaj Bjellorusisë në ndeshjen hapëse, kuqezinjtë kërkojnë të vijojnë me një tjetër rezultat pozitiv dhe të synojnë ngjitjen në Divizionin B. Edhe statistikat në transfertë japin arsye për optimizëm.
Kuqezinjtë kanë fituar tre nga katër ndeshjet e fundit jashtë fushe, të gjitha me rezultatin 0-1.
Një fitore me më shumë se një gol diferencë do të ishte e para në transfertë që prej qershorit të vitit 2023.
Përballë do të jetë San Marino, kombëtare modeste në letër, e cila vjen pas një humbjeje të rëndë 7-0 në shtëpi ndaj Finlandës.
Përfaqësuesja nuk fiton prej 15 ndeshjesh radhazi, me 14 humbje dhe vetëm një barazim, ndërsa në këtë periudhë ka pësuar 56 gola.
Fitorja e fundit, është po në Ligën e Kombeve, ndaj Lihtenshtejnit dy vite më parë. Shqipëria ka edhe avantazhin e historisë në përballjet direkte.
Kuqezinjtë i kanë fituar të katër ndeshjet e mëparshme ndaj San Marinos, me një bilanc prej 13 gola të shënuar dhe asnjë të pësuar.
Trajneri Maran pritet të mbeshtet te skema 4-2-3-1, e njëjtë që u përdor kundër Bjellorusisë, por mund të ketë edhe ndryshime e rotacione të vogla për të ruajtur energjitë.
Dilemat janë në disa reparte, ku besohet se Mitaj dhe Pilo do luftojnë për fanellën e titullarit, ndërsa hapësira mund të ketë edhe për Uzunin e Mehmetin, por edhe për Dakun, i cili dha sinjale pozitive në ato pak minuta ndaj Bjellorusisë.
Tashmë, me tre pikët e para në llogari, objektivi është edhe më konkret, dy fitore radhazi në startin e Ligës së Kombeve, diçka që Shqipëria nuk e ka arritur më parë në këtë kompeticion.
