Në kuadër të nismës “Mendo Politikisht” ndërmarrë nga Pro LGBT dhe Aleanca LGBT, janë krijuar dhe shpërndarë disa sondazhe për votuesit LGBTI.
Sondazhi më poshtë nuk synon të paraqesë preferencat partiake të komunitetit, por qëndrimet e tij për çështje të ndryshme politike si: E drejta e votës, aksesi i barabartë në shëndetësi, diskriminimi në ambientet e punës dhe shkollës, dhuna në familje etj
Nga rezultatet vihen re disa gjetje kryesore:
Vetëm 14% e të anketuarve janë shprehur se nuk do të votojnë në zgjedhjet e 25 qershorit. 69% janë të sigurt se do të votojnë, shifër kjo më e lartë krahasuar me votën e përgjithshme të popullsisë, që në zgjedhjet e kaluara ka qenë rreth 53%. Ndërsa 17% i mbetur është shprehur se nuk e ka vendosur ende nëse do të votojë.
Në një masë të madhe (75%), të anketuarit janë përgjigjur se vota e tyre ndikohet nga programet e partive politike ndërsa vetëm 11% shprehen se ndikohen nga premtimet e bëra gjatë fushatës elektorale.
Të anketuarve u është kërkuar të zgjedhin mes 5 çështjeve, që ata mendojnë se janë më të rëndësishme për komunitetin LGBTI. Çështja më e rëndësishme është ndalimi i diskriminimit në punë dhe sistemim arsimor me 80%, duke vazhduar më tej me ndalimin e dhunës në familje 62%. Ndryshe nga sa paraqitet në media, e drejta për të krijuar familje është në vendin e tretë me 50% e ndjekur nga e drejta për akses të barabartë në shëndetësi 47%.
1. Ndalimi i diskriminimit në ambientet e punës dhe sistemin arsimor për shkak të orientimit seksual apo identitetit gjinor 80%
2. Masa parandaluese për dhunën në familje ndaj komunitetit LGBTI 62%
3. E drejta për të krijuar një familje 50%
4. E drejta për akses të barabartë në shëndetësi, veçanërisht për komunitetin transgjinor 47%
5. Tjetër (Punësimi, të gjitha janë të rëndësishme, e drejta për pronën, barazi)
