Kur duhen vetëm pak javë nga referendumi i Britanisë së Madhe, një sondazh i realizuar në vendet e Bashkimit Europian ka treguar se euroskepticizmi po vjen gjithnjë e në rritje.
Në studimin e kompanisë amerikane, Pew Research Center, thuhet se tashmë vetëm 51% e qytetarëve në kontinentin e vjetër janë pro bllokut me 28 anëtarë, ndërkohë që 42% e të anketuarve kërkojnë që pushteti të rikthehet në vendet e tyre.
Pjesa tjetër nuk ka dhënë një qëndrim të qartë në lidhje me ketë çështje.
Kompania amerikane ka analizuar edhe gjendjen në 10 prej shteteve të BE-së, duke i pyetur qytetarët nëse e shohin si favorizues apo disfavorizues ndikimin e unionit.
Sondazhi tregoi se euroskepticizmi është më i madh në Greqi, pasi 71% e të anketuarve e kanë cilësuar si jo-favorizues ndikimin e BE-së, shkruan dita.
Ndërkohë, qytetarët që i mirëpresin më së shumti ndërhyrjet e bllokut me 28-antarë janë polakët. 72% prej tyre e shohin ndikimin e Bashkimit Europian si diçka favorizuese.
Shifra alarmante vërehen në Holandë, Gjermani, Spanjë, në Mbretërinë e Bashkuar dhe në Francë.
Situata më kritike paraqitet në Francë ku 61% e qytetarëve gjykojnë se roli i BE-së është tashmë jo-favorizues.
Rritja e euroskepticizmit është ndikuar nga një sërë faktorësh përfshirë krizën e emigrantëve dhe sulmet terroriste.
Më 23 qershor, qytetarët britanikë do të votojnë në një referendum, nga i cili do të përcaktohet edhe e ardhmja e vndit brenda ose jashtë BE-së.
Ekspertët druhen se një dalje e mundshme e Britanisë mund të shkaktojë një efekt domino edhe tek shtetet e tjera./ a.k
