Nga Eduard Zaloshnja
Rreth 40% e banorëve të Shqipërisë në moshë votimi mendojnë se Kuvendi duhej ta miratonte kërkesën e prokurorisë që të kërkonte në gjykatë arrestimin e Saimir Tahirit. Nga ana tjetër, po 40% kanë opinion të kundërt me të parët (20% kanë opinion neutral ose nuk e shprehin atë). Këto janë rezultatet e një sondazhi elektronik që zhvillova gjatë 24 orëve të fundit për revistën Follow Business Albania me rreth 2000 të anketuar në shkallë kombëtare. Kampioni u ripeshua, për ta përfaqësuar elektoratin shqiptar sa më mirë demogrfikisht dhe politikisht. Maksimumi i marzhit të gabimit për këtë sondazh ishte plus/minus 2.9 pikë përqindje.
Të përkthyera në numër votuesish (shihni grafikun), këto rezultate na tregojnë se rreth 840 mijë votues do të donin që Kuvendi ta kishte lejuar prokurorinë të kërkonte në gjykatë arrestimin e Saimir Tahirit. Nga ana tjetër, po aq (840 mijë) janë dakord me vendimin që mori në fakt Kuvendi (rreth 420 mijë kanë opinion neutral ose nuk e shprehin atë).
Nga sondazhi rezulton se shumica dërrmuese e të anketuarve që ishin kundër arrestimit të Tahirit kishin votuar për PS-në në zgjedhjet e fundit, ndërsa shumica dërrmuese e atyre që ishin pro arrestimit të Tahirit kishin votuar për partitë e tjera.
