Një sondë amerikane pa pilot pritet të bëhet sot mjeti i parë i hapësirës që eksploron miniplanetin Pluton.
Sonda “New Horizons” pritet t’i afrohet planetit Pluton në distancën 12 mijë e 500 kilometra, të marrë në këtë largësi fotografi dhe të dhëna, ndërsa i kalon pranë kësaj bote të akullt, me një shpjetësi 50 mijë kilometra në orë.
Por do të duhen më tepër se 12 orë që kontrollorët nga Toka në Agjencinë amerikane të Hapësirës NASA të marrin sinjale nga sonda, për të mësuar në se ajo ka arritur pa probleme pranë Plutonit.
Kryetari i grupit të shkencëtarëve, Alan Stern thotë se ekziston një rrezzik i vogël, 1 në 10 mijë raste, që sonda New Horizons të përplaset me trupa shkëmborë rreth Plutos, i cili ndodhet në një zonë të sistemit diellor, të quajtur “brezi Kuiper”, i cilësuar si “vendi i goditjeve” mes kometave dhe trupave të tjerë të vegjël qiellorë.
Mbërritja e Sondës tek miniplaneti Pluton është fundi i një udhëtimi 9-vjeçar, gjatë të cilit sonda ka përshkruar një distancë prej 5 miliardë kilometrash nëpër sistemin tonë diellor, drejt Plutos. Në vitin 2006 Pluto u cilësua si një miniplanet.
Më parë shkencëtarët kishin menduar se ai ishte një planet si gjithë të tjerët. Megjithatë, ata thonë se informacionet e marra nga sonda 700 milionë dollarëshe “New Horizons” duke ju afruar planetit, tregojnë se Pluton nuk është edhe aq i vogël sa mendohej.
