Menaxheri i përkohshëm i Manchester Unitedit, Ole Gunnar Solskajer, tërthorazi e ka kritikuar paraardhësin e tij, Jose Mourinhon, për taktikat që ka përdorur sa ishte në krye të ekipit.
Mourinho shpesh është kritikuar për stilin negativ të lojës, sidomos në ndeshjet derbi. Ky stil i aplikuar është raportuar si arsyeja kryesore e shkarkimit të tij që ndodhi në muajin dhjetor të vitit 2018.Që prej ardhjes së tij, Solskjaer ka fituar gjashtë ndeshjet me radhë, duke realizuar 17 gola. Ai ka thënë se stili i mëparshëm nuk ishte i njëjtë me filozofinë sulmuese që ka Unitedi.
“Gjëja e parë kur jeni pjesë e Manchester Unitedit është që të qeshni”, i ka thënë Solskjaer ish-partnerit të tij të sulmit, Teddy Sheringham, kur është pyetur se çfarë ka ndryshuar që prej ardhjes së tij në klub.“Ka të bëjë me sulmin, shpejtësinë dhe fuqinë.
E dimë se ne [ai dhe Teddy] nuk kishim aq shpejtësi, por prapë kemi sulmuar. Rreth kësaj është i ndërtuar Manchester Unitedi – futboll sulmues. Jo katërkëndësh qesharak dhe pasime prapa”, ka thënë norvegjezi, përgatiti Koha. (b.an)
