Steven Soderbergh ka marrë përsipër të bëjë filmin për raportimet e fundit nga “Panama Papers”, shkruan Koha Ditore.
Kineasti i cili kohëve të fundit është rikthyer si regjisor i filmave artistikë, është vënë në cilësinë e producentit të këtij filmi, por ende nuk është bërë e ditur nëse ai do ta bëjë edhe regjinë e këtij produksioni që do të trajtojë rrjedhjen më të madhe të informacioneve që ka ndodhur në histori.
Filmi i Soderbergh, sipas The Guarduan, do të bazohet në librin “Secrecy World”, me të cilin reporteri hulumtues, Jake Bernstein, mori çmimin “Pulitzer”.
Ai ishte njëri nga gazetarët e Rrjetit Ndërkombëtar të Gazetarëve Hulumtues, që nxori në dritë të dhënat nga “Panama Papers”. Adaptimin për skenar filmi pritet ta bëjë Scott Z. Burns, i cili është autor i skenarëve “Contagion”, “Side Effects” dhe “The Informant”.
“Panama Papers” ka zbardhur 11.5 milionë dokumente që ishin nxjerrë nga “Mossack Fonseca” në Panama, njëra nga kompanitë më të mëdha “offshore” në botë.
Dokumentet kanë nxjerrë në pah se si biznesmenë e politikanë të njohur nëpërmjet vjegëzave ligjore mundohen t’u ikin tatimeve. Liderë botërorë, përfshirë presidentin rus Vladimir Putin, kryeministrin pakistanez, ashtu sikurse edhe kinematografë si Pedro Almodóvar, janë të përfshirë në listën e atyre që kanë përfituar fonde në këtë formë.
Të dhënat janë publikuar nga një burim anonim në gazetën gjermane “Süddeutsche Zeitung” dhe prapa tyre ka qëndruar Rrjeti Ndërkombëtar i Gazetarëve Hulumtues. Ky rrjet më pas ka publikuar të dhënat edhe në një rrjet ndërkombëtar të bashkëpunëtorëve, përfshirë edhe mediat si “The Guardian” dhe BBC. Në vitin 2009, Soderbergh kishte thënë se ndoshta do të heqë dorë nga regjia. Kishte treguar për “The Guardian” se “po e shesh fundin e karrierës”.
Por në fund të fundit tash rezulton se kjo ishte vetëm një pauzë. Pas regjisë në seritë kritike në televizion si “The Knick”, adaptimit të filmit “The Girlfriend Experience” dhe të qenit pjesë e filmit “Magic Mike XXL”, Soderbergh është duke iu kthyer regjisë së filmit artistik bashkë me Logan Lucky për një triler në skenën e garave “Nascar”. Aty do të jenë edhe yjet Channing Tatum, Adam Driver, Katherine Heigl dhe Seth MacFarlane.
Folegjenda: Steven Soderbergh do të jetë në cilësinë e producentit të filmit për “Panama Papers” dhe ende nuk është konfirmuar nëse ai do ta bëjë edhe regjinë. (b.an)
