Shoqëria shqiptare është e dy polarizuar mes të pasurve dhe të varfërve. Sociologu Gëzim Tushi i ftuar në studion e lajmeve në Ora News është i mendimit se njerëzit e pasur i duhen shoqërisë. Ai thotë se nuk është dakord me termin oligark, pasi siç shprehet pa borgjezi nuk ka demokraci.
Gëzim Tushi: Është bërë një stratifikim i shpejtë i shoqërisë, një polarizim i shpejtë i shoqërisë. Kjo ka krijuar dy pole, ka një pol të të pasurve, ne nganjëherë themi oligarkët megjithëse unë nuk jam dakord me këtë termin që të anatemojmë njerëzit e pasur që janë të suksesshëm me punën e tyre, sepse e kam thënë dhe e them, pa borgjezi nuk ka demokraci. Ata i duhen shoqërisë, janë vlerë e madhe dhe duhen mbështetur dhe jo ti vëmë pas murit dhe ti godasim, me të drejtë dhe pa të drejtë, natën dhe ditën duke ia nxirre jetën atyre sipërmarrësve. Nuk po them për ata që janë të korruptuar, që atë e bëjnë me favore qeveritare, apo që pasurinë e vënë në rrugë të paligjshme. Unë nuk di ndonjë mënyrë tjetër, atëherë rruga tjetër është të kthehemi prapa, të shkojmë tek ekonomia e planifikuar, me industri shtetërore, me kooperativa bujqësore etj. Kjo pjesa e pasur e njerëzve është njëra anë.
Tushi po ashtu ngre shqetësimin për shtimin e njerëzve të varfër.
Gëzim Tushi: Por nga ana tjetër është shtuar shumë edhe shtresa e njerëzve të varfër, të marxhinalizuar e atyre që jetojnë në nivelin e varfërisë. Duhet ta pranojmë që niveli i varfërisë në shoqërinë shqiptare është shumë i lartë. Numri i familjeve që marrin ndihmë ekonomike edhe pse është reduktuar, në 1998 filloi me 151 mijë familje në skemën e ndihmës ekonomike, sot ka vajtur 50-60 mijë.
Për të ulur varfërinë, por edhe për të ndikuar të ata që janë shumë të pasur, Tushi thotë se duhet të investojmë më shumë tek shtresa e mesme.
Gëzim Tushi: Ajo që mua me shqetëson është hollimi i shtresës së mesme qytetare në shoqëri. Ekzistenca e shtresës së mesme qytetare, ku bëjnë pjesë nëpunësit, të punësuarit, intelektualët, njerëzit e biznesit të vogël, të shërbimit social e mjekësor është shumë e rëndësishme të forcohet sepse është baza e qytetërimit urban. Nëse duam të rregullojmë jetën tonë duhet të bazohemi fort te kjo shtresë sepse ajo ka vlerat e saj dhe është sistem referimi për dy polet e tjera, edhe për të pasurit e shumtë, edhe për të varfrit.
/a.r
