Në arsyetimet e ish-ministrit Manja, që nuk i bënte kurrë publikisht, por vesh më vesh, thuhej se ishte nën presionin e SPAK për ta bërë këtë, gjë që duket shumë e dyshimtë që SPAK t’ia konfidonte këtë Ulsi Manjës, edhe pse mund ta kenë dëshirë ta linçojnë. Themi e vështirë, se nëse ata kanë kaq konfidencë me Ulsiun, sa t’i kërkojnë linçimin e një drejtuesi të lartë socialist, atëherë duhet që ta kenë pasur Ulsi Manjën njeri konfident për shumë operacione të tjera kundër socialistëve të arrestuar, përtej rastit Veliaj dhe kjo e bën atë pastaj një ish ministër problematik.
Me këtë nuk them që Ministri i Drejtësisë nuk duhet të bashkëpunojë me SPAK, por kjo do të ishte një rrethanë që do të fliste për “bashkëpunim special” mes tij dhe SPAK, dhe jo për një bashkëpunim për shkak të detyrës. Sepse, nëse do të ishte i tillë, atëherë ata nuk do të guxonin të rekomandonin masa speciale apo tortura speciale, siç përcaktohet edhe në raportin e Komitetit për Parandalimin e Torturës të Këshillit të Evropës, në këtë rast. Duhet një konfidencë shume e madhe mes SPAK dhe Ulsiut për ta bërë këtë. Vetëm të qenit dibran, nuk besoj se ta jep këtë siguri të shkosh deri në këtë pikë.
Dhe fakti që ky regjim special ndaj Veliajt vazhdon në burg, ndërkohë që Veliaj klasifikohet si i burgosur nën një regjim “standard” sipas përgjigjes zyrtare të Drejtorisë së Burgjeve, fsheh diçka më tepër.
Një tjetër shpjegim jo publik i zyrtarëve të burgjeve është pretendimi se kanë presion nga Shërbimi Informativ i Shtetit (SHISH) dhe nga BKH.
Kjo është po ashtu e pabesueshme. Nëse SHISH vërtet ka rekomanduar masa speciale ndaj Veliajt, Drejtoresha e SHISH duhet hetuar jo thjesht për Veliajn, por se rikthen në shërbim politik një institucion i cili prej vitit 2002, së paku, nuk ka pasur akuza për përdorim politik. Pra, nëse është e vërtetë që ka dhënë qoftë edhe një rekomandim, kjo dorë duhet prerë.
Më e besueshme mbetet që ndaj tij ka pasur një zell politik brenda PS-së për ta linçuar, duke parë angazhimet personale të prokurorëve të çështjes kundër tij dhe pozitat e dobëta politike të Veliaj në kohën që u arrestua duke menduar se zhurma dhe gjyqet popullore do të mbysnin zërat e dobët që kërkonin standardet e drejtësisë në këtë proces dhe ai do të ishte kurbani që do të ilustronte “peshqit e mëdhenj” të PS.
Po të lexosh portalet e fundorrinave paguar nga brenda PS që shtiren si opozitarë kjo duket dhe më e qartë, pasi ata sulmojnë çdo kënd që i del në mbrojtje Veliajt por jo socialistëve të tjerë që arrestohen.
Prandaj është mirë që vetë socialistët ta hetojnë këtë që ka ndodhur, qoftë në rrugë shtetërore, qoftë edhe parlamentare, nëse është nevoja. Jo për gjë, por burgjet po mbushen me socialistë e zyrtarë të lartë, dhe ky standard që është aplikuar dhe vazhdon të aplikohet ndaj tij, duket sikur e trajton atë si të burgosur nga socialistët, dhe jo si socialist i paraburgosur nga SPAK, fatkeqësisht pa asnjë arsyetim ligjor.
