Skënderbeu do të luajë takimin e dytë të grupeve të Europa Ligës dhe të parin për këtë edicion në fushën e vet ndaj ekipit zviceran, Jang Bojs. Sigurisht, në një përballje të tillë bardhekuqtë kërkojnë më shumë se kurrë mbështetjen e tifozëve.
Për të pasur sa më shumë tifozë të pranishëm në stadium, klubi ka menduar edhe një herë të vendosë autobusë pa limit nga Korça në drejtim të Elbasanit. Burime të “Panorama Sport” në klub konfirmojnë se janë gati 30 autobusë që do të nisen drejt Elbasanit, në bazë të kërkesave të tifozëve.
Natyrisht, në një situatë të tillë, kur ndeshja zhvillohet në orën 21:05, edhe nisja është programuar të bëhet në orën 16:00 para stadiumit “Skënderbeu”. Vetë klubi ka vendosur të bëjë thirrje për praninë e sa më shumë tifozëve në një ndeshje të rëndësishme, ku skuadra do të kërkojë të marrë maksimumin, pasi presidenti Ardjan Takaj ka paralajmëruar që synimi këtë edicion është të kalohet edhe faza e grupeve.
Mësohet se deri dje në mbrëmje ishin shitur gjithsej 4 mijë bileta, një shifër e konsiderueshme kur bëhet fjalë për emrin e kundërshtarit, por edhe për faktin se sot është e enjte dhe ndeshja në një orar kaq të vonë nuk i favorizon tifozët që do të vijnë nga Korça.
ma.me
