Skënderbeu sot për historinë, Milsamit i duhet mrekullia në “Elbasan Arena”
Skënderbeu do të luaj sot në mbrëmje në “Elbasan Arena”, ndeshjen e kthimit me Milsamin, në kuadër të turit të tretë eliminatorë të Ligës së Kampionëve.
Skuadra korçare është një hap larg historisë. Bardhekuqtë e Mirel Josës pasi fituan 2-0 në Moldavi, falë një dygolëshi të Salihit, tashmë i duhet vetëm të administrojnë rezultatin për t’u kualifikuar në turin tjetër, atë të Play Off, çka do të thoshte një hap larg fazës së grupeve dhe zyrtarizimin e pjesëmarrjes së Skënderbeut në fazën e grupeve të Europa Ligë.
Në këtë betejë, tifozeria ka një pjesë të rëndësishme të suksesit dhe për këtë arsye mbi 15 autobuzë janë vendosur në dispozicion nga klubi për të transportuar sportdashësit korçarë nga qyteti i serenatave në Elbasan, për ta pikturuar qytetin e ballokumeve me ngjyra feste.
Për të mos u përsëritur incidentet e ndodhura në takimin mes Kukësit dhe Legias së Varshavës, Presidenti Ardjan Takaj ka kërkuar nga Policia e Elbasanit kontrolle ekstreme dhe masa maksimale për mbarëvajtjen e takimit. Gjithashtu, presidenti i korçarëve ka pajtuar një agjenci sigurimi, e cila do të mundësojë rreth 300 stjuard në stadium për të mbikqyrur tifozerinë gjatë zhvillimit të takimit.
Në “teatrin” ku do të marrë jetë beteja mes Skënderbeut dhe Kukësit, Mirel Josa nuk do të ketë të disponueshëm, Latifin, i cili është ndaluar në seancën stërvitore të së hënës nga një kontraktim muskulor. Mungesa e Latifit e detyron trajnerin Mirel Josa të bëjë ndryshime në formacion, duke kthyer në 11-shen titullarë Gerhard Prognin, po pa ndryshuar rreshtimin e skuadrës. Në krahun e majtë të mbrojtjes, në mungesë të të pezulluarit Arapi do të aktivizohet Eskuardinja, ndërsa në qendër, ku mungon Tefik Osmani, do të luajë Jashanica.
Tashmë gjithçka është gati në të dyja kampet dhe pritet vetëm ora e nisjes së takimit, 20:45, që të gjithë shqiptarët të bashkohen rreth skuadrës që përfaqëson qytetin e serenatave dhe që nga nesër do të mbahet mend qyteti, skuadra e të cilës preku për herë të parë ëndrrën europiane në vendin tonë.
/ATA
