Trajneri Mirel Josa ka dhënë intervistën e fundit përpara ndeshjes ndaj Sporting Lisbon që do të zhvillohet nesër në orën 19:00. Josa në konferencën për shtyp është shprehur se është i vetëdijshëm për vështirësinë e ndeshjes me porugezët por shprehet se ekipi do zhvillojë lojën e zakonshme dhe objektivi është paraqitja dinjitoze.
Çfarë dini për ekipin e Sporting ?
E para ju përshëndes të gjithëve, ne jemi të qartë mbi vështirësinë këtij takimi dhe për historinë e madhe që ka Sporting. Ekipi Portugez ka lojtarë sulmues shumë të mirë dhe cilësorë, por mbi të gjitha bëjnë presing shumë lart.
Në dy vitet e fundit nën drejtimin e z.Jesus Sporting ka ecur mjaft para dhe objektivat janë të qarta, kampionat dhe Europa League. Për ne kjo është një eksperience e re dhe e rëndësishme është paraqitja dinjitoze.
Cfarë objektivash keni për këtë ndeshje ?
Objektivi ynë është të bëjmë paraqitje të mira, të rrisim autoritetin në fushë dhe të gabojmë sa më pak në këtë ndeshje.
Ne jemi vazhdimisht në rritje këtë e kanë dëshmuar dy ndeshjet e para të Europa League. Sporting është ekipi më i mirë i grupit dhe fakti që ka një pikë nuk do të thotë asgjë.
Unë e di që keni një ndeshje të rëndësishme në fundjavë, por edhe ne kemi një ndeshje mjaft të rëndësishme për ecurinë e kampionatit ndaj Partizanit.
Duke qenë që sipas jush Sporting është ekipi i më i mirë si keni menduar ta neutralizoni?
Unë i qëndroj besnik mënyrës tonë të lojës dhe nuk kam për ta ndryshuar atë pavarësisht ekipit që kemi përballë. Do mundohemi të gabojmë sa më pak, të bëjmë presing dhe të bllokojmë sulmin e kundërshtarëve. Të jeni të sigurt kur kemi topin në zotërim zhvillojmë lojë të bukur, lojën tonë.
Siç thash më sipër në fundjavë kemi një ndeshje të rëndësishme dhe sigurisht do të bëj rotacion dhe disa lojtarë do t’i ruaj për të dielën ndaj Partizanit. Sigurisht që këtij takimi i kemi dhënë rëndësinë e duhur, por e rëndësishme është që disa lojtarë t’i kem të freskët për kampionatin…
