Në redaksinë e Fiks Fare ka ardhur një tjetër skemë që përdornin institucionet që mblidhnin kreditë e këqija, ku disa drejtues, pronarë, përmbarues e punonjës janë akuzuar për skemën e zhvatjes.
Kësaj herë pre ka rënë një emigrante, e cila ka ardhur për të ndihmuar të vëllanë, por e ka parë veten si kreditore kur “s’kam marrë asnjë qindarkë kredi në Shqipëri”. Por, jo vetëm që “mori kredi”, por edhe shtëpinë e sekuestruar kësaj familje, kjo emigrante u “detyrua” që të paguante qira mujore …
Lindita Dena tregon për Fiks Fare se i vëllai bashkë me një shokun e tij kishin marrë një kredi në një nga bankat e nivelit të dytë me vlerë 20 milion lekë të vjetra. “Historia vijoi se unë vij me pushime dhe i thonë vëllait që shtëpia jote ka dalë në ankand në vitin 2017. Shtëpia ndodhet në Fushë Krujë, është shtëpi private. Në Tiranë shkova te kreditë e këqija, mbas Ministrisë së Drejtësisë. Më duket se Micro Credit. MCA-ja.
Unë aktualisht nuk jetoj në Shqipëri dhe se di si funksionon procedura këtu. Ata më thanë se vëllai duhet të rinovojë një kredi. I thashë që ia paguaj unë se ai ishte në proces ndarje dhe doja të mos merrej vesh. Doja të mirën e vëllait tim. Aty nuk di ça kanë bërë. E kam paguar këtë shtëpi, qiranë dhe kam paguar 3 milionë që kam hapur këtë dosjen te banka. Unë shkova atje dhe i thashë se aty ka familjarë brenda te shtëpia që kishin marrë. Më nxirrni familjarët që të paguaj shtëpinë.
Unë paguaja edhe kredinë edhe qiranë” thotë znj. Dena. Ajo tregon se nuk ka marr asnjëherë kredi në Shqipëri, ndërkohë në dokumentet që i paraqiti gazetarëve të Fiksit emri i saj figuron se kredi marrëse dhe dorëzane e vëllait të saj më shumën 450 mijë lekë.
Ndërkohë që në kohën që vëllai bashkë me shokun kanë marrë kredinë Lindita nuk ka qenë fare në Shqipëri. Nuk është njoftuar që është kredi marrëse, por vetëm ka qenë e rregullt në pagesat mujore ku paguante 180 mijë lekë të vjetra qiranë e shtëpisë dhe kredinë diku tek 100 mijë lekë të vjetra.
Fiks Fare shfletoi dokumentet e denoncueses, ku rezulton se shtëpia e lënë kolateral kishte kaluar në pronësi të Micro Credit. Madje, MCA-ja ia dha në vitin 2017 me qira denoncueses, e cila paguante çdo muaj edhe “kredinë e pa marrë” edhe shtëpinë që nuk qëndroi asnjë ditë brenda.
Megjithëse paguante një shumë mujore, ajo dhe vëllai s’kanë jetuar asnjë ditë në atë banesë. Madje, nuk morën asnjë informacion për mënyrën që duhet të ndiqnin për ta riblerë. Por, vijonin të paguanin dhe të mbaheshin peng nga MCA-ja, në një skemë zhvatëse pafund.
“Shkova te Stacioni i Trenit dhe i thashë më jep dokumentet ta paguaj shtëpinë kesh. Ata më thonë se nuk e di ku janë dokumentet. Pasi s’më dhanë asnjë përgjigje,asnjë dokument unë fillova të mos paguaj. Pas ca kohësh më thonë se ti je filanja, po i them. Më thonë se ke një shtëpi në Fushë Krujë, po i them. Më përgjigjen se shtëpia jote do të dalë në ankand se keni marrë një kredi. Po unë s’kam marrë kurrë kredi, por vetëm kam hedhur lekë në bankë. Më detyruan që të shes shtëpinë time në Fushë Krujë mos ma merrnin ata. E shita, ç’të bëja nga frika.
Ndërkohë shtëpinë e vëllait ku kanë jetuar prindërit? Ka qenë në emër të vëllait, tani e ka banka. Tani pse mos ta marr unë. Lekët i duan ata po shtëpi s’kanë. Kam paguar lekët dhe shtëpi s’kam pas kurrë” tregon Lindita.
Denoncuesja ka paguar çdo muaj kredi dhe qira. Por, s’e ka gëzuar kurrë atë shtëpi të lënë trashëgimi nga familja. Madje, pas presioneve të punonjësve të MCA-së, është detyruar të shesë edhe shtëpinë. Ky rast është një skemë tjetër e përdorur nga MICRO CREDIT, ku megjithëse kësaj familje i ka marrë shtëpinë e lënë kolateral, e ka detyruar që t’a marrin me qira dhe t’i bëjnë letrat për një kredi të re, pa i dhënë asnjë qindarkë.
