Gjykata e Apelit ka liruar nga burgu dy infermieret e spitalit “Shefqet Ndroqi” në Tiranë, duke caktuar masën “detyrim paraqitje” për Sidorela Çelën dhe Rukije Hoxhën, të akuzuara më parë si bashkëpunëtore të sanitares-mashtruese, Tire Alldervishi, me akuzën për mashtrim.
Ndërkohë që për Mira Bushin dhe Sheqerie Koçi, gjykata ka vendosur mospranim ankimi, pasi nuk ishte bërë konform rregullave.
Tre infermieret dhe sanitarja, u arrestuan më 8 shkurt, pasi u akuzuan se kishin krijuar një skemë të mirëfilltë me qëllimin e vetëm kriminal që të përfitojnë sa më shumë ndaj pacientëve të sëmurë me sëmundjen Covid 19 dhe familjarëve të tyre.
Në një prononcim për mediat, avokatja Antoneta Sevdari, e të pandehurës Sidorela Çelës, tha se Gjykata kishte vlerësuar të paligjshëm ndalimin e tyre, dhe sipas saj e gjente të drejtë lirimin e tyre nga ambientet e qelisë.
‘Detyrim për t’u paraqitur e mbështesim vendimin e gjykatës. Prokurori nuk kishte evidentuar veprimin apo mos veprimin. Vetë vendimi i gjykatës dilte në konkluzionin se nuk kishin bashkëpunuar me Tire Alldervishin. Gjykata tha se prokuroria duhet të kishte konstatuar veprimet e paligjshme, dhe se në përgjime nuk kishte prova të mjaftueshme për të evidentuar bashkëpunimin mes personave. ‘- tha avoktja.
g.kosovari
