Kryetari i Bashkisë Lezhë, Fran Frrokaj, dhe 11 zyrtarëve të tjerë të bashkisë, do të dalin nesër përpara Gjykatës për tu njohur me masën e sigurisë.
Seanca ndaj tyre do të nisë në orën 09:00.
Kreu i bashkisë u arrestua të premten pasi akuzohet për tjetërsim të pronave në zonën e quajtur “Rana e Hedhun”, ndërsa dosja në ngarkim të tij është hetuar nga Prokuroria e Krimeve të Rënda.
Pas arrestimit të kryebashkiakut Frrokaj dhe zyrtarëve të tjerë, me urdhër të Prokurorisë, janë sekuestruar pesë parcela toke me një sipërfaqe prej 258 324 m2.
Ndërkohë, arrestimi i Frrokajt është pritur me protesta nga simpatizantët e tij, të cilat kanë filluar prej ditës së djeshme dhe vazhdojnë edhe sot të mbledhur para bashkisë
Për këtë ngjarje, kryetari i Partisë Demokratike, Lulzim Basha tha se drejtësia është selektive. Basha kërkoi një hetim transparent për këtë rast, jopolitik dhe të paanshëm.
“Urojmë që Fran Frrokaj të jetë i pafajshëm, të gjithë duhet të jenë të barabartë para ligjit, nga qytetarët e thjeshtë tek politikanët më të lartë. Ne kërkojmë që hetimi të jetë transpraent, jo politik dhe i paanshëm. Shqiptarët meritojnë një drejtësi të pastër dhe profesionale dhe jo një drejtësi të kapur dhe ndikuar nga axhenda politike për drejtësi selektive të drejtuar ndaj një krahu politik në favor të një krahu tjetër”, tha Basha. Pas kësaj deklarate Basha së bashku me nënkryetarin Paloka, shkuan në Lezhë.
a.ç
