Një foto e dy dekadave më parë vë në pozitë të vështirë kryeministrin kanadez Justin Trudeau. Fotoja e publikuar nga revista Time, tregon kryeministrin popullor të Kanadasë, me fytyrën e lyer me ngjyrë kafe, gjatë një feste me kostume në vitin 2001.
Trudeau kërkoi ndjesë për imazhin që mund të minojë mundësinë e rizgjedhjes së tij, më pak se 5 javë para se kanadezët t’u drejtohen qendrave të votimit.
Shefi i ekzekutivit kanadez që po lufton për rizgjedhje në këtë post në 21 tetor, deklaroi se i “vjen tmerrësisht keq“ për veprimet e tij.
Fotoja konsiderohet politikisht turpëruese për liderin që është përpjekur t`i kthejë politikat progresive në boshtin e qeverisjes së vet. Duke folur për gazetarët pas publikimit të fotos, Trudeu sqaroi se ishte veshur me kostumin e Aladinit në një mbrëmje me temë:
“Në vitin 2001, kur isha mësues në Vancouver, mora pjesë në një gala, ku tema ishte “mbrëmjet arabe”. U vesha si Aladini dhe vura make up në fytyrë. Nuk duhej ta kisha bërë, më vjen vërtet keq”, deklaroi kryeministri kanadez.
Por ndërkohë e ka pasur edhe një incident tjetër të ngjashëm, kur sërish e ka lyer fytyrën në të zezë gjatë një show talentesh. Praktika e lyerjes së fytyrës në të zezë konsiderohet se ka sfond negativ kundër afro-amerikanëve, e në shumicën e rasteve shihet si gjest ofendues dhe racist.
g.kosovari
