Autoriteti për Informimin e Dosjeve, me nisjen e punës këtë fillim janari, ka konstatuar probleme nga më të ndryshmet, që do të thotë se procesi për zbulimin e spiunëve të Sigurimit nuk do të jetë i lehtë. Gazeta Sot shkruan se përpos dosjeve të painventarizuara që nga viti 1992, ku një pjesë e tyre janë zhdukur dhe dëmtuar, mungojnë edhe dokumentet e 90 për qind të personave që jetojnë, atyre që janë ndjekur nga Sigurimi i Shtetit dhe bashkëpunëtorëve.
Të dhënat për këta individë kanë vështirësuar punën e Autoritetit, ashtu si edhe dosjet e painventarizuara që do t’i marrin shumë kohë anëtarëve të këtij institucioni. Sipas burimeve, Autoriteti do të marrë në pyetje persona që kanë dijeni zhdukjen e të dhënave. Do të jetë një departament i posaçëm që do të merret me dëshmitë e individëve të ndryshëm, të cilat më pas do t’i përpunojë.
Te Autoriteti nuk do të dëshmojnë vetëm individë që kanë informacione se kush i ka vjedhur këto të dhëna, por do të ketë edhe dëshmi gojore të njerëzve të ndryshëm për një individ apo një ngjarje të caktuar. Ata individë që do të vijnë të dëshmojnë do të shpërblehen nga Autoriteti. Aktualisht, Autoriteti u ka dërguar shkresë institucioneve për grumbullimin e dosjeve. Do të bëhet një bilanc për dosjet e zhdukura, të dëmtuara dhe të painventarizuara. Sa i takon këtyre të fundit, do të bëhet nga një grup specialistësh, të cilët do të asistojnë në këtë proces. Do të vijnë edhe specialistë nga Gjermania që do të japin kontributin e tyre në inventarizimin e dosjeve. Në këtë proces do të jenë të pranishëm edhe anëtarët e Autoritetit.
Dosjet si në SHISH, në Ministrinë e Brendshme dhe në institucione të tjera ndodhen të mbyllura në kuti kartoni, të cilat do të hapen në prani të specialistëve që do bëjnë inventarizimin dhe anëtarëve të Autoritetit. /b.d
