2 trilionë dollarë është shuma e përgjithshme e transaksioneve që bankat me famë botërore u kanë mundësuar në 2 dekadat e fundit grupeve kriminale dhe të akuzuarve për shmangie të taksave. Skandali është zbuluar nga Konsorciumi Ndërkombëtar i Gazetarëve Investigativë, të cilët kanë zbuluar mbi 2 600 dokumente që faktojnë përfshirjen e bankave të mëdha në veprimtari kriminale.
Në dokumente faktohet përfshirja e bankave si HSBC, JP Morgan, Barklays apo Deutsche Bank, të cilat kanë qendra apo filiale të rëndësishme në Londër.
Dokumentet tregojnë se si HSBC u mundësoi mashtruesve të transferojnë nëpër vende të ndryshme të botës, miliona dollarë të grabitura përmes mashtrimeve edhe pse ishin informuar nga hetuesit amerikanë për skemat e manipulimit të përdorura prej tyre. JP Morgan lejoi një kompani të transferonte 1 miliardë dollarë njëherësh përmes një llogarie të hapur në Londër, pa qenë në dijeni se kush e kishte një shumë kaq të madhe.
Banka zbuloi më pas se kompania që kishte bërë transferimin ishte në pronësi të një personi në listën e 10 më të kërkuarve në botë nga FBI. Deutsche Bank transferoi para të pista të krimit të organizuar, terrorizmit dhe drogës.
Në dokumente u zbuluan edhe donacione të fshehta nga oligarkët e lidhur me presidentin rus Vladimir Putin për konservatorët britanikë në qeveri.
/a.r
