Prokurori i Përgjithshëm i Ukrainës, Ruslan Kravchenko, ka dhënë dorëheqjen pas një hetimi të madh për korrupsion, në të cilin janë përfshirë disa zyrtarë të institucionit që ai drejtonte.
Dorëheqja e Kravchenkos erdhi pas një takimi me presidentin ukrainas Volodymyr Zelensky. Hetuesit e Byrosë Kombëtare Antikorrupsion të Ukrainës (NABU) dhe Prokurorisë Speciale Antikorrupsion (SAPO) kanë zbuluar një rrjet të dyshuar kriminal që lidhej me qendra telefonike të paligjshme.
Sipas hetuesve, këto qendra telefonike mashtronin qytetarë në Ukrainë, Rusi dhe vende të Bashkimit Evropian, duke u paraqitur si banka, institucione të drejtësisë ose këshilltarë investimesh. Viktimat bindeshin të transferonin paratë e tyre në llogari ose kuleta kriptomonedhash të kontrolluara nga rrjeti.
Hetuesit pretendojnë se disa zyrtarë të lartë të Prokurorisë së Përgjithshme mbronin këtë aktivitet në këmbim të pagesave mujore. Sipas burimeve të hetimit, secila qendër telefonike paguante mijëra dollarë në muaj për mbrojtje, ndërsa shumat e ryshfeteve arrinin në miliona dollarë.
Hetuesit e NABU-së bastisën zyrën e Kravchenkos, ndërsa ai nuk ndodhej aty. Sipas autoriteteve, gjatë operacionit u sekuestruan edhe shuma të mëdha parash dhe prova të tjera që lidhen me aktivitetin kriminal.
Kravchenko ka mohuar çdo përfshirje në shkelje dhe i ka cilësuar akuzat ndaj tij si të pabazuara. Pas dorëheqjes, ai tha se nuk dëshironte që posti i Prokurorit të Përgjithshëm të përdorej si mjet në përplasjet politike.
Zelensky ka zhvilluar gjithashtu takime me drejtuesit e NABU-së dhe SAPO-s, institucione që kanë luajtur rol kryesor në hetimin e skandalit. Presidenti ukrainas kishte tentuar vitin e kaluar të kufizonte pavarësinë e këtyre dy institucioneve, por u tërhoq pas protestave në Kiev dhe qytete të tjera.
Skandali vjen në një moment të vështirë për Ukrainën, e cila vijon të përballet me sulme të vazhdueshme ruse. Ndërkohë, lufta kundër korrupsionit mbetet një nga çështjet kryesore për Ukrainën në procesin e saj të integrimit në Bashkimin Evropian.
Deputetë ukrainas kanë kërkuar reforma në sistemin e prokurorisë dhe një proces më transparent për zgjedhjen e Prokurorit të Përgjithshëm, duke theksuar se lufta kundër korrupsionit është thelbësore për të ardhmen evropiane të vendit.
