LSI-ja ka shkarkuar nga detyra kreun e saj në Elbasan pas përfshirjes në skandalin e barnave. Sekretari i Përgjithshëm i LSI-së, Luan Rama tha se vendimi vjen nga kryesia e partisë. 3 zyrtarë të Drejtorisë Rajonale të Fondit të Sigurimit të Detyrueshëm të Kujdesit Shëndetësor Tiranë dhe 5 drejtues farmacish, janë ndaluar pasi dyshohen se kanë krijuar një skemë të madhe mashtrimi me rimbursimin e medikamenteve.
Mes tyre është edhe drejtori i Fondit, Pjerin Xhuvani, kryetar i LSI –së në Elbasan dhe ish – Drejtor i Spitalit Psikiatrik të këtij qyteti. Prokuroria e Tiranës ka nisur hetimin për veprat penale “Mashtrimi me subvencione”, “Fallsifikim të dokumentave shëndetësore”, “Pastrimit të produkteve të veprës penale”, dhe “Shpërdorimit të detyrës”.
Dyshohet se disa punonjës të Fondit të Kujdesit Shëndetësor Tiranë, u kanë dhënë disa farmacive të drejtën e përfitimit nga rimbursimi i medikamenteve. Sipas hetimeve të Prokurorisë rezulton se gjatë periudhës shtator 2014 – mars 2015, këto farmaci kanë përfituar në mënyrë të kundraligjshme një shumë totale rimbursimi nga shteti në vlerën rreth 56 milionë lekë.
Barnat e ruimbursuara kanë qenë kryesisht për kurimin e sëmundjeve tumorale. Recetat për to janë falsifikuar. Në njoftimin për shtyp Prokuroria thotë se dy zyrtarët e Drejtorisë Rajonale të Fondit të Sigurimit kanë mundësuar që farmacitë të përfitojnë padrejtësisht nëpërmjet lidhjes së kontratave me këto farmaci, në kushtet kur farmacitë nuk kanë përmbushur kriteret e kërkuara nga ligji dhe aktet nënligjore në fuqi.
Prokuroria e Tiranës dyshon se të tjerë persona janë të përfshirë në skemën e mashtrimit me rimbursimin e medikamenteve mjekësore. Ndaj hetimet po vazhdojnë dhe pritet të shoqërohen me arrestime të tjera.
