Gjykata e Apelit ka lënë në fuqi vendimin për Kastriot Ismailaj i cili është dënuar me 11 vite burg për aferën e CEZ.
Ish-administratori i kompanisë akuzohet për tre vepra penale, mashtrim me pasoja të rënda me borxhet e CEZ, rreth 5 milionë euro, pastrim parash dhe falsifikim dokumentesh.
Sekseri i këtij privatizimi, Nuel (Nue) Kalaj, njeri i Shkëlzen Berishës, ka marrë 7 milionë euro vetëm pak ditë para zgjedhjeve të vitit 2009.
Më herët sipas dëshmive të paraqitura në Komisionin Hetimor, rezultoi se ai është mik i Shkëlzen Berishës, ç’ka bën që të lindin dyshimet për përfshirjen e këtij të fundit në këtë aferë.
Për çfarë akuzohet Kastriot Ismailaj?
Kastriot Ismailaj u arrestua në 12 maj të vitit 2015 nga Sektori i Pastrimit të Parave dhe ai i Krimit Ekonomik dhe Financiar ne Policinë e Shtetit për veprën e mashtrimit në shuma të mëdha dhe pastrimit të produkteve të veprës penale. Në 6 muaj, 9 kompani private përfituan nga CEZ-i 12 milionë USD nga kontratat për mbledhjen e borxheve të papaguara. Pjesën më të madhe të fondeve e ka marrë “Debt International Management”, me administrator Kastriot Ismailaj, 649 milionë lekë, ose gati 6.5 milionë dollarë.
Nga “Debt International Advisori” paratë kanë dalë nga Shqipëria duke hyrë në llogaritë e dhjetëra kompanive të tjera, që veprojnë në rreth 15 shtete. Sipas burimeve nga prokuroria, bëhet fjalë për shuma financiare që ka dyshime të forta se i përkasin njerëzve të politikës dhe personave VIP në Shqipëri, pasi kjo kompani fantazmë nuk ka kryer as vjeljen e borxheve të “CEZ Shpërndarje”, për të justifikuar transfertat, aq më tepër që shuma e transferta është shumë më e madhe se 5 milionë euro.
Kastriot Ismailaj, nën “maskën” e marrëveshjes me kompaninë çeke, “CEZ Shpërndarja”, për mbledhjen e borxheve ka kryer mbi 100 transaksione bankare, para këto që kanë qenë të personave të rrethit shoqëror të tij.
a.ç
