Një skandal është shënuar në Gjykatën e Durrësit, raporton News24.
Një qytetare thotë se e kanë martuar me një person tjetër, në fshehtësi të plotë, me qëllim grabitjen e pronës së saj.
Gjykatësja Flora Hasimi ka martuar një 63-vjeçare pa dijeninë e saj.
Luljeta Hoxha thotë se qëllimi është grabitja e pronës.
“Unë kam 28 vjet e martuar me Luan Hoxhën, por gjykatësja më ka martuar në fshehtësi me Gëzim Xhyretën, me qëllim grabitjen e pronës”.
“Gjykata për të prishur një vendim pronësie më ka martuar me shtetasin Gëzim Xhyreta, të cilit i kam blerë një pronë në vitin 2003. Por, edhe ta shoh në rrugë këtë shtetas, nuk e mbaj mend për fytyrë. Ky është skandal i madh, pasi më kanë sjellë një shqetësim shumë të madh në jetën familjare. Gjykatësja që më ka martuar pa dijeninë time ose nuk është e aftë mendërisht, ose e korruptuar”, u shpreh 63-vjeçarja”, thotë Hoxha.
Për Gazetën Shqiptare, zonja sqaron: “Unë i kam blerë atij një pjesë të truallit ku sot kam furrën e bukës me vlerë 30 milionë e 500 mijë lekë të vjetra. Kam blerë vetëm pjesën që i takonte Xhyretës dhe jo të 7 trashëgimtarëve të tjerë. Pasi bleva pronën, nipërit e shitësit kërkuan që të ma merrnin dhe më hodhën në gjyq. Kam 10 vjet nëpër gjyqe, por nuk kam marrë pjesë në seancat gjyqësore. Në gjyq jam përfaqësuar nga avokatja, të cilës i kam dhënë prokurë. Vetë nuk u paraqita për arsye shëndetësore.
Më 7 dhjetor të vitit që shkoi u dha vendimi i gjykatës së Durrësit. Në orën 19:00 të kësaj dite, avokatja ma tha që e kemi humbur gjyqin. Pritëm zbardhjen e vendimit më 29 dhjetor. Vendimi më ra në dorë më 30 dhjetor. U shokova kur lexova vendimin. Gjykatësja Flora Hasimja për të prishur vendimin e shitjes së pronës më kishte martuar me shitësin e pronës, Gëzim Xhyretën. Vetëm kështu mund ta prishte vendimin, pasi dy bashkëshortë nuk mund t’i shesin e t’i blejnë pronën njëri-tjetrit. Më tronditi dhe më la pa mend që gjykatësja e çështjes më kishte martuar për së dyti pa dijeninë time me një person që s’ka asnjë lidhje me mua. Nga tronditja e madhe përfundova në spital.
Përveçse më ka bërë bashkëshorten e shitësit, gjykata ka dhënë vendim skandaloz që unë të kthej edhe shumën prej 32,5 milionë lekë të vjetra që kam paguar për blerjen e kësaj prone. Në bazë të vendimit kërkohet që t’i kthej pronën “bashkëshortit” tim së bashku me paratë”.
Hoxha thotë se organet e dretësisë duhet të nisin hetimin ndaj gjyqtares Hoxha. “Gjithashtu, për këtë rast u drejtohem dhe presidentit të Republikës, KLD-së, kryetarit të Parlamentit, kryeministrit, ministrit të Drejtësisë, Avokatit të Popullit, ambasadorit amerikan”.
