Mazhoranca dhe opozita dështojnë përfundimisht në konkretizimin e marrëveshjes së 24 dhjetorit të ndërmjetësuar nga dy deputetët e Parlamentit Europian, Kukan dhe Fleckenstein.
Data 30 qershor 2015 ishte afati i fundit që Parlamenti të realizonte ndryshimet e nevojshme ligjore për dekriminalizimin e administratës dhe të politikës.
Tashmë pakti PS-PD i dhjetorit të shkuar, mbeti thjesht një marrëveshje e shkruar në letër, pasi asnjëra nga palët nuk arritën dot të gjenin konsensusin mes tyre. “Procesi i ndryshimeve legjislative që do të burojnë nga kjo marrëveshje do të nisë në fillim të sesionit të ardhshëm parlamentar dhe do të përmbushet brenda datës 30 qershor 2015″, parashikohej në rezolutën e miratuar më 24 dhjetor të vitit të shkuar.
Pas miratimit të rezolutës së përbashkët në seancën e fundit plenare të vitit të shkuar, i vetmi konsensus formal ishte ai i seancës plenare të 19 shkurtit, ku me 102 vota pro dhe asnjë kundër Kuvendi miratoi ngritjen e komisionit të posaçëm parlamentar për zbatimin e marrëveshjes së 24 dhjetorit 2014, dhe që do të drejtohej nga demokrati Oerd Bylykbashi.
E gjithë veprimtaria e këtij komisioni përmblidhet në tri mbledhje formale, të cilat u shërbyen palëve për të bërë akuza dhe kundërakuza në funksion të propagandës elektorale për zgjedhjet vendore të 21 qershorit. Ndërkohë që asnjë nismë ligjore nuk u ndërmor seriozisht nga palët, të cilat nuk dhanë asnjë shenjë vullneti që kjo marrëveshje të prodhonte dhe ndryshimet “e premtuara” ligjore që do të bënin të mundur pengimin e personave që kishin të kaluar kriminale të përfshiheshin në administratën publike, në bashkitë e reja apo dhe në Kuvendin e Shqipërisë.
Demokratët kërkuan gjatë këtyre muajve që marrëveshja të zbatohej me zgjedhjet vendore që sapo u zhvilluan, duke kërkuar të mos lejohej kandidimi i personave me rekorde kriminale për kryetarë të bashkive apo të këshillave bashkiakë. Por ndërkohë që marrëveshja përcaktonte se ndryshimet e nevojshme ligjore që mund të preknin një sërë ligjesh të rëndësishme bënin të mundur që kjo marrëveshje të niste zbatimin në zgjedhjet parlamentare të 2017-s.
