Shtetet e Bashkuara të Amerikës i janë përgjigjur kryeministrit në detyrë Albin Kurti, duke i bërë të qartë se nuk ekziston asnjë plan sekret për shkëmbim territoresh mes Kosovës dhe Serbisë.
Në një deklaratë të përbashkët, i dërguari i Shtëpisë së Bardhë për dialogun, Richard Grenell dhe i dërguari i Departamentit të Shtetit për Ballkanin Perëndimor, Mathew Palmer nënvizojnë se këto janë spekullime.
“Ne duam të sqarojmë se nuk ka asnjë plan të fshehtë për shkëmbim të territoreve ndërmjet Kosovës dhe Serbisë, siç kanë spekuluar disa. I dërguari i posaçëm presidencial, Richard Grenell, nuk e ka parë dhe as diskutuar kurrë një plan të tillë. Përqendrimi i qeverisë amerikane është në mbështetjen e marrëveshjeve të fundit për të rivendosur lidhjet ajrore, hekurudhore dhe autostradë midis Kosovës dhe Serbisë”, thuhej në deklaratën e përbashkët Grenell-Palmer.
Ndaj kesaj deklarate nuk ka pasur ende nje reagim nga Kurti, ndërkohë që kreu i LDK-së, Isa Mustafa, i ka kërkuar kryeministrit të kërkojë falje.
“Të dështuarit që fajësuan SHBA-të për pazotësinë e tyre, sot duhet t’u kërkojnë falje të gjithë qytetarëve të Kosovës dhe miqve tanë për konstruksionet e servirura parreshtur dhe fyerjet e paskurpullta të drejtuara ndaj LDK-së dhe figurave të saj. SHBA demantuan spekulimet se ekziston një plan sekret për shkëmbim të territorit”, tha Mustafa.
Ndërkohë, presidenti Thaçi njoftoi se në fillim të javës së ardhshme do të mbledhë liderët politikë për formimin e qeverisë.
“Nga e hëna do të filloj konsultimet me liderët e partive politike për mundësinë e formimit të qeverisë së re, fokusi im do të jetë të eliminohet shpërbërja e kuvendit dhe zgjedhjet. Të hënën do dëgjoj mendimet e tyre, qeveria aktuale është në ikje dhe në detyrë, të shkojmë drejt një qeverie të unitetit”, u shpreh Thaçi.
Deklaratat vijnë pas votimit në Kuvend të mocionit që rrëzoi qeverinë Kurti, por pa e shpërbërë parlamentin dhe pa e çuar vendin në zgjedhje të reja për shkak të koronavirusit. /e.s/
