Dëshmia e ish-kongresistit amerikan Joseph DioGuardi në Washington, para disa ditësh, u bë shkas që ai të jetë cak i sulmeve të disa politikanëve nga radhët e pozitës në Kosovë. DioGuardi e quajti ndërmarrje haraçi partinë e Hashim Thaçit dhe shkaktare e humbjes së shpresës së qytetarëve në Kosovë. Kjo solli edhe reagimin e zëvendësit të Thaçit në Ministrinë e Punëve të Jashtme, Petrit Selimi.
Ky i fundit u kundërpërgjigj duke thënë se deklaratat e DioGuardit janë si ato të Vuçiç, Gjuriç e Jeremiç. Gjatë një interviste për gazetën “Zëri”, ish-kongresisti amerikan, i cili thotë me mburrje që ka gjak shqiptari, DioGuardi, pranon se është i zhgënjyer me të gjithë liderët politikë shqiptarë në Ballkan.
Pavarësisht se lobimin për zgjidhjen e çështjes së shqiptarëve e bën pa asnjë interes financiar, DioGuardi thotë se një angazhim i tillë nuk vlerësohet nga politikanët si Hashim Thaçi.
Gjatë kësaj interviste ai mes tjerash flet edhe për themelimin e Gjykatës Speciale, si dhe i kundërpërgjigjet akuzave ndaj tij të Petrit Selimit, etj.
“Unë flas me shqiptarët të cilët vijnë në Washington dhe më tregojnë se sa keq është në Kosovë, ku ka 60 për qind papunësi. Kjo është çmenduri. Nëse nuk keni një punë në Qeveri, atëherë nuk ka punë, as në bujqësi nuk ka asgjë”, ka thënë DioGuardi.
Redaksia Online
(JavaNews.al)
