Pasi Monika Kryemadhi i kërkoi falje për djegien e mandateve, ka ardhur edhe reagimi i të shoqit. Ilir Meta shprehet sot se e falenderon zonjën Kryemadhi për reflektimin.
Sa i përket zgjedhjeve, presidenti ka dalë sërish në ‘origjinë’. Ai flet në reagim për banda dhe krime. Në reagim, kuptohet se Ilir Meta as e ka në plan dorëheqjen siç kishte premtuar në rast të fitores së Edi Ramës.
Ai thotë se sapo të mbarojë detyrën e presidentit, do të rikthehet në LSI.
Reagimi:
Presidenti i Republikës, Sh.T.Z Ilir Meta falenderon Kryetaren e LSI, znj.Monika Kryemadhi për reflektimin e saj lidhur me lënien e mandateve dhe bojkotin e zgjedhjeve vendore, që e mbifuqizuan pushtetin e Kryeministrit dhe i lehtësuan bërjen e shumë ligjeve korruptive me porosi dhe në interes vetëm të oligarkëve dhe blerjes së zgjedhjeve.
Presidenti Meta vlerëson fushatën e ndershme dhe model të LSI dhe sidomos rreth 110 mijë qytetarët, të cilët i rezistuan presionit të mafies, bandave, diskriminimit mediatik, survejimit dhe presioneve policore.
Presidenti Meta shpreh keqardhjen për tjetërsimin masiv të votave, por kjo ishte e pritshme, për më tepër, që nuk u morrën masat e duhura për parandalimin e këtij krimi të rëndë zgjedhor.
Presidenti Meta në respekt të sakrificave për demokracinë, që ka bërë LSI, i njofton të gjithë anëtarët dhe simpatizantët e saj se më 24 korrik 2022 do të rikthehet për të marrë kartën e anëtarësisë së LSI dhe do t’u bashkohet përpjekjeve të të rinjve dhe të rejave për Shqipërinë e Shqiptarëve.
Por çfarë thoshte Presidenti pak ditë para 25 Prillit? Ndiqeni videon e mëposhtme:
